نۇر-سۇلتاننان الماتى، قوستاناي جانە شىمكەنتكە قوسىمشا پويىزدار قاتىناي باستايدى

نۇر-سۇلتان. قازاقپارات - قازاقستان پويىزدارىندا قىزمەت كورسەتۋدىڭ جاڭا ستاندارتى ەنگىزىلدى.

بۇل تۋرالى «جولاۋشىلار تاسىمالى» ا ق باسقارما ءتوراعاسى جانىبەك تايجانوۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە ەل اۋماعىندا پويىز قاتىنايتىن 138 باعىت بار. ونىڭ ىشىندە 104 مارشرۋت بويىنشا تاسىمالعا ءبىز جاۋاپتىمىز. قالعان باعىتتارعا جەكە تاسىمالداۋشى كومپانيالار جاۋاپتى. ەلىمىزدە ۇلتتىق تاسىمالداۋ كومپانياسىنان بولەك، 9 جەكە كومپانيا بار. الداعى شىلدە-تامىزدا «نۇر-سۇلتان - قوستاناي»، «نۇر-سۇلتان - الماتى» جانە «نۇر-سۇلتان - شىمكەنت» باعىتى بويىنشا قوسىمشا پويىزداردى ىسكە قوسۋ جوسپارلانىپ وتىر. ونىڭ ىشىندە الدىڭعى 2 باعىت بويىنشا تالگو پويىزى قاتىناماق. جالپى قازىر ق ت ج- عا قاراستى 2215 ۆاگون بار. ونىڭ ىشىندە 1429 بۇرىنعى ستاندارتتى ۆاگون جانە 670 تالگو ۆاگوندارى»، - دەدى جانىبەك تايجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

باسقارما ءتوراعاسىنىڭ ايتۋىنشا، ەلىمىزدە پويىز قىزمەتىنە قاتىستى جاڭا ستاندارت ەنگىزىلدى.

«جاڭا ستاندارتتىڭ ىشىنە تازالىق ساقتاۋ، قىزمەت كورسەتۋ كىرەدى. پويىزدارعا قاتىستى بۇعان دەيىن بولعان پروبلەما - بيلەت ساتۋشى دەلدالدار جانە بيلەتتەردى جاپپاي ساتىپ الىپ تاپشىلىقتى قولدان جاساۋ ماسەلەسى شەشىلدى. اتالعان ماسەلەلەردى شەشۋ ءۇشىن 2 جىل بۇرىن «موبيۋس» بيلەت ساتۋ جۇيەسى ىسكە قوسىلعان ەدى. جاڭا جۇيە تيىمدىلىگىن كورسەتتى. قازىر الىپساتارلىق جوق»، - دەيدى ول.

سونداي-اق، «جولاۋشىلار تاسىمالى» ا ق باسشىسى پاندەميادان كەيىن ت م د بويىنشا قازاقستان حالىقارالىق پويىز رەيستەرىن قايتا ىسكە قوسقان العاش ەل ەكەنىن ايتىپ وتىر.

«بۇگىندە 11 حالىقارالىق پويىز رەيسى بار. ولار رەسەيدىڭ استراحان، ومبى، سامارا قالاسىنا قاتىنايدى. سونىمەن قاتار وزبەكستان مەن قىرعىزستان استاناسى بىشكەككە پويىزدار قاتىناپ تۇر»، - دەدى ج. تايجانوۆ.