اقتوبەلىك وقۋشى حالىقارالىق وليمپيادادا التىن مەدال الدى
30 ماۋسىم 17:41

اقتوبەلىك وقۋشى حالىقارالىق وليمپيادادا التىن مەدال الدى

اقتوبە. قازاقپارات - اقتوبەدەگى نازاربايەۆ زياتكەرلىك مەكتەبىنىڭ وقۋشىسى سانجار حاميتوۆ egeo - 2022 وليمپياداسىنىڭ التىن مەدالىن جەڭىپ الدى، دەپ حابارلايدى قازاقپارات ءتىلشىسى.

اقتوبەلىك NIS وقۋشىسى سانجار حاميتوۆ ەل تاريحىندا تۇڭعىش رەت گەوگرافيادان EGEO - 2022 ەۋروپالىق وليمپياداسىنىڭ التىن مەدالىن جەڭىپ الدى.

11-سىنىپ وقۋشىسى 16-19 جاس ارالىعىنداعى جوعارى ليگا قاتىسۋشىلارى اراسىندا ابسوليۋتتى جەڭىمپاز اتاندى.

«گەوگرافيا الەمدى تانۋعا كومەكتەسەدى. ءبىر عانا ءپان ارقىلى اسپان الەمىن، پلانەتالاردى، ۋاقىت پەن كەڭىستىكتى زەرتتەپ، زەردەلەۋگە بولادى. گەوگرافياعا ۇڭىلگەن سايىن تانىمىم كەڭەيىپ، ءتۇرلى ەلگە «ساياحاتتاپ» تا كەتەمىن. مۇنداي جارىسقا قاتىسقان كەزدە الدىن الا دايىندالىپ، ءوز ءبىلىمىمدى تولىقتىرامىن. ناتيجەسى ءوزىمدى دە، جاقىندارىمدى دا قۋانتتى. وليمپياداعا كەلەر بولسام، العاشقى تۋردا كارتا بەردى. ونداعى ەلدىڭ ورنالاسۋى، دامۋى تۋرالى ايتىپ بەردىم. دامۋ جولىن دا مىسالعا كەلتىرۋگە بولادى. مۋلتيمەديالىق تۋردا ءار سۇراققا جاۋاپ بەرۋگە 30 سەك ۋاقىت ءبولدى. بارلىعى 40 سۇراق بولدى. ءۇشىنشى تۋردا ۇلتتىق پاركتى ساقتاۋ جولدارىن ايتىپ بەردىك. ءتۋريزمدى دامىتۋ جولى دا نازاردان تىس قالمادى. سۇراق بولسا، ءبىز ونىڭ شەشىمىن ايتىپ، ۇسىنىسىمىزدى بىلدىردىك»، - دەيدى EGEO-2022 التىن مەدالىنىڭ يەگەرى سانجار حاميتوۆ.

بۇعان دەيىن ول گەوگرافيا پانىنەن رەسپۋبليكالىق، جەلىلىك وليمپيادالاردىڭ التىن مەدالدارىن جەڭىپ العان.

ايتا كەتەيىك، سانجاردىڭ جاتتىقتىرۋشىسى اقتوبەدەگى زياتكەرلىك مەكتەپتىڭ تۇلەگى، EGEO -2021 حالىقارالىق گەوگرافيالىق وليمپياداسىنىڭ جەڭىمپازى رۋستام ۆالەيەۆ.

«وليمپيادا ءۇش تۋردان تۇردى. ولار: جازباشا، مۋلتيمەديالىق، دالالىق. بارلىق تۋردا سانجار جاقسى ناتيجە كورسەتتى. بۇل جولعا جەتۋ ءۇشىن ول تالاي ەڭبەك ەتتى. تەوريالىق ءبىلىمىن تاجىريبەمەن ۇشتاستىردى. تاعى ءبىر قۋانتارلىعى، بارلىق قاتىسۋشىعا قاراعاندا سانجار اعىلشىن ءتىلىن جوعارى دەڭگەيدە مەڭگەرگەنىن كورسەتتى»، - دەپ اتاپ ءوتتى رۋستام ۆالەيەۆ.

بۇل وليمپيادا 24-29 - ماۋسىم ارالىعىندا ونلاين فورماتتا ءوتتى. وعان بەلارۋس، رەسەي، ءازىربايجان، ليتۆا، لاتۆيا، ەستونيا، سەربيا، سلوۆەنيا، قازاقستان، رۋمىنيا، چەحيا، بولگاريا، بوسنيا جانە گەرتسەگوۆينا ەلدەرىنەن 111 ءبىلىمدى جاس قاتىستى. ەندى سانجار حاميتوۆ іgeo جانە IESO حالىقارالىق وليمپيادالارىنا قاتىسادى.

جاڭالىقتار