استانا پوليتسەيلەرىنە اقىلى جولدارداعى بەينەباقىلاۋ كامەرالارى قولجەتىمدى بولماق

نۇر-سۇلتان. قازاقپارات - نۇر-سۇلتان قالاسىندا ۇرلىقتىڭ الدىن الۋ جانە ءىزىن سۋىتپاي اشۋ ماقساتىندا پوليتسيا قىزمەتكەرلەرى ءۇشىن رەسپۋبليكالىق جولداردا ورناتىلعان بەينەباقىلاۋ كامەرالارىن قولجەتىمدى ەتۋ ماسەلەسى قارالىپ جاتىر، دەپ حابارلايدى قازاقپارات ءتىلشىسى.

«قازىرگى ۋاقىتتا «قازاۆتوجول» ۇلتتىق كومپانياسىمەن اقىلى تاسجولدار بويىنداعى بەينەباقىلاۋ كامەرالارىنا پوليتسيا قىزمەتكەرلەرىنىڭ قولجەتىمدى بولۋ ماسەلەسى قارالىپ جاتىر. ياعني ۇرلىقتىڭ الدىن الۋ ماقساتىندا قۇزىرلى مەملەكەتتىك جانە قوعامدىق ۇيىمدارمەن بىرلەسكەن جۇمىس قولعا الىنۋدا. بۇل شارا ۇرلىق بولعان جاعدايدا ءىستى شۇعىل اشىپ، كىنالىنى تەز تابۋعا سەپتىگىن تيگىزەدى. جالپى وسى كۇنگە دەيىن ۇرلىقتىڭ الدىن الۋعا قاتىستى 24 پروفيلاكتيكالىق ءىس-شارا جانە 48 رەيد ءوتتى»، - دەدى نۇر-سۇلتان قالاسى پوليتسيا دەپارتامەنتى ەسىل اۋدانى پوليتسيا باسقارماسى كريمينالدىق پوليتسيا ءبولىمىنىڭ باسشىسى، پوليتسيا مايورى سامعات تىنىشيەۆ ب ا ق- قا ارنالعان بريفينگتە.

ونىڭ ايتۋىنشا، كوكتەم مەن جازدا ەلوردا اۋماعىندا كوبىنەسە ۆەلوسيپەد، ساموكات قولدى بولادى. سونداي-اق، قالا سىرتىنداعى ساياجايلاردا ۇرلىق ءجيى تىركەلەدى.

«شلاگباۋم بار اقىلى جولداردا بەينەباقىلاۋ كامەرالارى ورناتىلعان. پوليتسيا قىزمەتكەرلەرى بەينەباقىلاۋ كامەرالارىنىڭ مۇراعاتىنا قول جەتكىزۋى ءۇشىن ءبىز «قازاۆتوجول» ۇلتتىق كومپانياسىمەن بىرلەسىپ جۇمىس ىستەيمىز. مىسالى، كولىك ۇرلاندى دەلىك، ۇرى كولىكتى اقىلى جولمەن قاراعاندى جاققا ءمىنىپ كەتەدى. وسى تۇستا اۆتوموبيل مەن ونداعى كۇدىكتىنى انىقتاپ، تابۋ ءۇشىن ءبىز «قازاۆتوجولعا» رەسمي ساۋال جىبەرۋىمىز كەرەك. بۇل پروتسەسس ۋاقىت الادى. ەگەر اتالعان كومپانيامەن بىرلەسىپ ارەكەت ەتسەك، ۇرلىق جاساۋ فاكتىسىن جەدەل اشۋ مۇمكىندىگى تۋادى. پوليتسيا قىزمەتكەرلەرىنە بەينەباقىلاۋ كامەرالارى قولجەتىمدى بولماق»، - دەيدى ول.

بۇعان دەيىن قالالىق پوليتسيا دەپارتامەنتىنىڭ وكىلى ەلوردا اۋماعىندا بولاتىن قىلمىستىڭ 41 پايىزى ۇرلىق جاساۋمەن بايلانىستى ەكەنىن ايتىپ ءوتتى.