الماتىدا ءوزىن پوليتسيا قىزمەتكەرى رەتىندە تانىستىراتىن الاياقتار كوبەيىپ كەتتى

None
None
الماتى. قازاقپارات - الماتى قالالىق پوليتسيا دەپارتامەنتى باستىعىنىڭ ورىنباسارى رۋستام ءابدىراحمانوۆ تۇرعىنداردى ينتەرنەت- الاياقتاردان ساق بولۋعا شاقىردى، دەپ حابارلايدى قازاقپارات ءتىلشىسى.

«قىلمىسكەرلەر مىنانداي سحەمامەن ارەكەت ەتەدى: ولار ۇيالى تەلەفونعا قوڭىراۋ شالىپ، ءوزىن پوليتسيا قىزمەتكەرىمىن دەپ تانىستىرادى. سونىڭ ىشىندە مەنىڭ دە اتىمدى اتاۋى مۇمكىن. سودان كەيىن ءسىزدىڭ اتىڭىزعا نەسيە الماق بولعان الاياقتاردى ۇستاۋ ءۇشىن قازىر ارنايى وپەراتسيا جۇرگىزىلىپ جاتقانىن ەسكەرتەدى»، - دەپ جازدى رۋستام ءابدىراحمانوۆ ءوزىنىڭ تەلەگرام- كانالىندا.

رۋستام ءابدىراحمانوۆتىڭ ايتۋىنشا، «جالعان پوليتسيا قىزمەتكەرلەرى» قازىر ق ر ۇلتتىق بانكىمەن بىرلەسىپ جۇمىس ىستەيتىنىن حابارلاپ، ءدال سول كەزدە ولارمەن بايلانىساتىنىن ايتىپ، جەلىدە قالۋدى سۇرايدى. بۇل - الاياقتاردىڭ تاعى ءبىر ارەكەتى.

«ودان كەيىن تەلەفوننىڭ ارعى جاعىنداعى ادام ءسىزدىڭ كارتاڭىزعا رۇقساتسىز اقشا اۋدارۋ ارەكەتتەرى ءجۇرىپ جاتقانىن جانە اقشاڭىزدى ساقتاۋ ءۇشىن بانك شوتىنا نەمەسە ءۇشىنشى تۇلعالاردىڭ شوتىنا بەلگىلى ءبىر سومانى سالۋ كەرەك ەكەنىن ايتىپ، ۇگىتتەيدى»، - دەپ اتاپ ءوتتى پوليتسيا وكىلى.

الماتى قالالىق پوليتسيا دەپارتامەنتى باستىعىنىڭ ورىنباسارى پوليتسيا قىزمەتكەرلەرى ەشقاشان تەلەفون ارقىلى ارنايى وپەراتسيالار مەن تەرگەۋ ارەكەتتەرىن جۇرگىزبەيتىنىن ەسكەرتتى.

«مۇنداي جاعدايلاردا تەلەفونمەن سويلەسۋدى توقتاتىپ، بانك كارتاسىندا نەمەسە بانك سايتىندا كورسەتىلگەن سەنىمدى نومىرگە قايتا قوڭىراۋ شالۋ كەرەك. قانداي جاعداي بولماسىن بانك كارتاڭىزدىڭ دەرەكتەرىن، سونىمەن قاتار جەكە باسىڭىزعا قاتىستى مالىمەتتەرىڭىزدى ەشكىمگە ايتپاڭىز، جىبەرمەڭىز»، - دەدى رۋستام ءابدىراحمانوۆ.

سوڭعى جاڭالىقتار