بوزجىرادا تۋريستىك نىسان سالۋ ماسەلەسى كۇن تارتىبىنەن تۇسكەن جوق - نۇرلان نوعايەۆ

نۇر- سۇلتان. قازاقپارات - ماڭعىستاۋ وبلىسىنىڭ اكىمى نۇرلان نوعايەۆ ورتالىق كوممۋنيكاتسيالار قىزمەتىندە وتكەن بريفينگىدە بوزجىرادا قوناق ءۇي كەشەنىن سالۋدىڭ كەلەشەگى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«بوزجىرانى وبلىستىڭ كورنەكتى ورىندارىنىڭ ءبىرى رەتىندە يگەرۋ ماسەلەسى كوتەرىلگەن كەزدە قوعامدىق رەزونانس تۋىنداعانى راس. كەيىن ول جوبا توقتاتىلدى»، - دەدى ايماق باسشىسى. ونىڭ مالىمەتى بويىنشا، بوزجىرادان 4 شاقىرىم جەردە قوناقۇي جانە باسقا دا نىساندار سالۋ مۇمكىندىگى بار دەگەن شەشىم قابىلدانعان.

«ءبىز قوناقۇي سالعىمىز كەلە مە، جوق پا، وعان قاراماستان بوزجىرا، تۇزبايىر، شەرقالا سياقتى ادەمى ورىندارعا تۋريستەر ءبارىبىر كەلىپ جاتىر. كەلە بەرەدى دە. سوندىقتان بۇگىنگە ءبىز كاسىپكەرلەرمەن بىرگە ساپار ورتالىقتارىنىڭ قۇرىلىسىن ۇيىمداستىرىپ جاتىرمىز. ياعني، كەلۋشىلەر تۇنەپ، قاجەتتى سەرۆيس الاتىن عيماراتتار سالىنادى. وسى تۇرعىدان العاندا ماسەلەنىڭ باسى ءالى اشىق قالىپ وتىر. بوزجىرادا نە سالاتىنىمىز تۋرالى ناقتى تۇسىنىك جوق. ياعني، ماسەلە كۇن تارتىبىنەن الىنعان جوق»، - دەدى نۇرلان نوعايەۆ.

ەسكە سالساق، ماڭعىستاۋ وبلىسى اكىمدىگىنىڭ باسپا ءسوز قىزمەتى بوزجىرادا قوناق ءۇي كەشەنى سالىنبايتىن بولعانىن راستاعان ەدى.

اۆتور: ەسىمجان ناقتىباي