دەپۋتاتتار ساۋالىنا ۇكىمەت سىرعىتپا جاۋاپتار بەرەدى - ەرلان قوشانوۆ
30 ماۋسىم 13:27

دەپۋتاتتار ساۋالىنا ۇكىمەت سىرعىتپا جاۋاپتار بەرەدى - ەرلان قوشانوۆ

نۇر- سۇلتان. قازاقپارات - دەپۋتاتتار ساۋالىنا ۇكىمەت ستاندارتتى، سىرعىتپا جاۋاپتار بەرەدى. بۇل تۋرالى بۇگىن پارلامەنت پالاتالارىنىڭ بىرلەسكەن وتىرىسىندا ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«دەپۋتاتتىق كورپۋستىڭ وزدەرىنىڭ ساۋالدارىنا بەرىلەتىن جاۋاپتاردىڭ ساپاسىنا دا كوڭىلى تولماي جاتادى. ساۋالداردا ءبىز، ەڭ الدىمەن، سايلاۋشىلارىمىزدىڭ تىلەگى مەن اماناتىن كوتەرەتىنىمىزدى ءتۇسىنۋ كەرەك. وعان ۇكىمەت پەن باسقا دا مەملەكەتتىك ورگانداردان ستاندارتتى، سىرعىتپا جاۋاپتار كەلەدى. سوندىقتان، مەملەكەتتىك ورگانداردىڭ دەپۋتاتتىق ساۋالدارعا اۋىزشا جاۋاپ بەرۋىن پراكتيكاعا ەنگىزدىك»، - دەدى ە. قوشانوۆ.

ونىڭ ايتۋىنشا، الداعى ۋاقىتتا دەپۋتاتتار كورپۋسى مەن ۇكىمەت مۇشەلەرى زاڭ ساپاسىن ارتتىرۋدا جۇيەلى جۇمىستى جولعا قويۋعا بىرلەسىپ اتسالىسۋى كەرەك.

«ەكىنشى سەسسيانى قورىتىندىلاي كەلە، قوس پالاتانىڭ باسقا ەلدەرمەن جانە حالىقارالىق ۇيىمدارمەن قارىم- قاتىناستى نىعايتۋ جونىندەگى جۇمىسىنىڭ اۋقىمدىلىعىن اتاپ وتكەن ءجون. سەسسيا بارىسىندا پارلامەنت دەپۋتاتتارى 13 حالىقارالىق پارلامەنتتىك ۇيىم اياسىندا بەلسەندى جۇمىس ىستەدى، 360 حالىقارالىق ءىس- شاراعا قاتىستى جانە شەتەلدىڭ 24 پارلامەنتىمەن ىنتىماقتاستىقتى جۇزەگە اسىردى»، - دەدى ءماجىلىس ءتوراعاسى.

بۇدان بۇرىن حابارلانعانداي، ە. قوشانوۆ ەكىنشى سەسسيانىڭ زاڭنامالىق كۇن ءتارتىبى ايتارلىقتاي مازمۇندى بولعانىن ايتتى.

«ماسەلەن، پارلامەنت پالاتالارىنىڭ 4- بىرلەسكەن وتىرىسى ءوتتى. ءماجىلىستىڭ 42 جالپى وتىرىسى ءوتىپ، وندا 271 ماسەلە قارالدى. سەناتتىڭ 42 جالپى وتىرىسى ءوتىپ، وندا 148 ماسەلە قارالدى. وسى سەسسيا كەزىندە قوس پالاتانىڭ جۇمىسىندا 127 زاڭ جوباسى بولدى، ونىڭ 78- ءى قابىلداندى»، - دەدى ءماجىلىس ءتوراعاسى.

جاڭالىقتار