زەينەت جاسىن تومەندەتۋ ماسەلەسى تالقىلانىپ جاتىر - تامارا دۇيسەنوۆا
30 ماۋسىم 12:43

زەينەت جاسىن تومەندەتۋ ماسەلەسى تالقىلانىپ جاتىر - تامارا دۇيسەنوۆا

نۇر- سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا زەينەت جاسىن تالقىلاۋ تۋرالى ۆيتسە- پرەمەر ەرۇلان جاماۋبايەۆتىڭ مالىمدەمەسىنە جاۋاپ بەردى، دەپ حابارلايدى قازاقپارات ءتىلشىسى.

بۇعان دەيىن پرەمەر- ءمينيستردىڭ ورىنباسارى، قارجى ءمينيسترى ەرۇلان جاماۋبايەۆ قازاقستاندىقتاردىڭ زەينەت جاسىن تومەندەتۋ ماسەلەسى ەش قاراستىرىلماعانىن ايتقان ەدى.

«مۇندا ەشكىم وتىرىك ايتپادى. بيۋدجەتتىك پروتسەستى وزدەرىڭىز بىلەسىزدەر. قازىر ءبىزدىڭ مينيسترلىكتىڭ قارجى مينيسترلىگىمەن جانە ۇلتتىق ەكونوميكا مينيسترلىگىمەن بىرلەسكەن جۇمىس توبى بار. جۇمىس توبى ءبىرىنشى گرافيكتەن ءوتتى. ەندى ەكىنشى گرافيكتە مينيسترلەردىڭ الدىنا شىعۋىمىز كەرەك. ودان كەيىن رەسپۋبليكالىق بيۋدجەتتىك كوميسسياعا شىعامىز. سوندا قازىر ءبىز ءبىرىنشى توپتاعى جۇمىستى عانا بىتىردىك. ونىڭ ۇستىنە ەرۇلان جاماۋبايەۆ قارجى ءمينيسترى عانا ەمەس، ۆيتسە- پرەمەر. ءبىز ءالى مينيسترلەردىڭ الدىنا جەتكەن جوقپىز»، - دەپ جاۋاپ بەردى ت. دۇيسەنوۆا پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر ساۋالىنا.

سونىمەن بىرگە، ەڭبەك ءمينيسترى ەلدەگى الەۋمەتتىك سالا، زەينەتاقى ماسەلەلەرى جونىندە ايتىپ بەردى.

«قازىر زەينەتكە شىعىپ جاتقانداردىڭ زەينەتاقىلارى بۇرىن شىققان زەينەتكەرلەردىكىنەن تومەن، سەبەبى ەڭبەك وتىلدەرى از. سوندىقتان قازىرگى ءبىرىنشى ماسەلە - بازالىق زەينەتاقىلاردىڭ پارامەترلەرىن وزگەرتۋ، ياعني ونى كوبەيتۋ، ەكىنشى - ىنتىماقتاستىرىلعان زەينەتاقى ماسەلەرىن كوتەرۋ، ونىڭ دا پارامەترلەرىن قاراستىرۋ. سودان كەيىن زاڭ اياسىندا ەرتە زەينەتكە شىعۋ ماسەلەسى دە قاراستىرىلعان. «كۇمىس جاس» دەگەن جاڭا باعدارلاما جاسالىپ جاتىر. بارلىق ەسەپتەرىمىزدى جۇمىس توبىنا وتكىزدىك، ەندى ەكىنشى كەزەڭگە شىعىپ جاتىرمىز. بيۋدجەتتى قاراعاندا جۇمىس توبىندا ەڭ الدىمەن ۆيتسە- مينيسترلەر جۇمىس ىستەيدى، مەنىڭ دە ۆيتسە- ءمينيسترىم سول توپقا بارىپ ءجۇر. كەيىنگى توپتا بۇل ماسەلە مينيسترلەر دەڭگەيىندە تالقىلانادى. سوندىقتان، قازىر جۇمىس توبىندا بارلىق مينيسترلىك وكىلدەرى جۇمىس ىستەپ جاتىر. ال قارجى ءمينيسترىنىڭ ونى ءبىلۋ- بىلمەۋىنەن مەنىڭ حابارىم جوق»، - دەدى تامارا دۇيسەنوۆا.


جاڭالىقتار