پارلامەنت دەپۋتاتتارى كانيكۋلعا كەتتى
30 ماۋسىم 11:45

پارلامەنت دەپۋتاتتارى كانيكۋلعا كەتتى

نۇر- سۇلتان. قازاقپارات - بۇگىن پارلامەنت پالاتالارىنىڭ بىرلەسكەن وتىرىسى ءوتىپ، وندا جەتىنشى سايلانعان پارلامەنتتىڭ ەكىنشى سەسسياسى رەسمي تۇردە جابىلدى، دەپ حابارلايدى قازاقپارات ءتىلشىسى.

دەپۋتاتتار بيىلعى 1- قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى.

«ەكىنشى سەسسيانىڭ زاڭنامالىق كۇن ءتارتىبى ايتارلىقتاي مازمۇندى بولدى. ماسەلەن، پرالامەنت پالاتالارىنىڭ 4- بىرلەسكەن وتىرىسى ءوتتى. ءماجىلىستىڭ 42 جالپى وتىرىسى ءوتىپ، وندا 271 ماسەلە قارالدى. سەناتتىڭ 42 جالپى وتىرىسى ءوتىپ، وندا 148 ماسەلە قارالدى. وسى سەسسيا كەزىندە قوس پالاتانىڭ جۇمىسىندا 127 زاڭ جوباسى بولدى، ونىڭ 78- ءى قابىلداندى»، - دەدى ءماجىلىس ءتوراعاسى ەرلان قوشانوۆ.

وسى ورايدا ول پارلامەنت قابىلداعان زاڭداردىڭ قازىرگى ۋاقىتتا 66-سىنا پرەزيدەنت قول قويىپ، زاڭ كۇشىنە ەنگەنىن اتاپ ءوتتى.

«ادەتتەگىدەي دەپۋتاتتار ەلدىڭ باستى قارجىلىق قۇجاتى 2022-2024 -جىلدارعا ارنالعان رەسپۋليكالىق بيۋدجەتكە جانە ونى ناقتىلاۋعا باسا ءمان بەردى. مەملەكەتتىك الەۋمەتتىك مىندەتتەمەلەردى تولىق كولەمدە ورىنداۋعا، دەنساۋلىق ساقتاۋعا، ءبىلىم بەرۋگە، ينفراقۇرىلىمدى دامىتۋعا، شاعىن جانە ورتا بيزنەستى قولداۋعا جانە باسقا دا ماڭىزدى ماسەلەلەرگە قوماقتى قاراجات ءبولىندى. 2022 -جىلى قاڭتاردان باستاپ ەڭ تومەنگى جالاقى 42500 تەڭدەن 60 مىڭ تەڭگەگە دەيىن ءوستى. رەسپۋبليكالىق بيۋدجەتتى قاراۋ بارىسىندا دەپۋتاتتىق كورپۋس ازاماتتىق قىزمەتشىلەردىڭ جەكەلەگەن ساناتتارىنىڭ جالاقىسىن ورتا ەسەپپەن 20 پايىزعا ارتتىرۋ ءۇشىن قاراجات ءبولۋدى كوزدەدى. جالپى، العاندا، شامامەن 1,2 ميلليون ازاماتتىق قىزمەتشىنىڭ جالاقىسى ءوستى. ولاردىڭ قاتارىندا پەداگوگتەر، مەديتسينا قىزمەتكەرلەرى جانە الەۋمەتتىك قىزمەتكەرلەر، كىتاپحاناشىلار، مۋزەي قىزمەتكەرلەرى، ورمانشىلار، سونداي- اق باسقا سالانىڭ وكىلدەرى بار»، - دەدى ءماجىلىس ءتوراعاسى.

ونىڭ ايتۋىنشا، ناقتىلانعان رەسپۋبليكالىق بيۋدجەتتە قاڭتار وقيعالارىنىڭ سالدارىن جويۋ جونىندەگى، كۇشتىك قۇرىلىمدار مەن توتەنشە جاعدايلار ورگاندارىنىڭ جاۋىنگەرلىك ازىرلىگى مەن جاراقتاندىرىلۋىن ارتتىرۋ جونىندەگى ءىس- شارالاردى قارجىلىندىرۋعا ەرەكشە نازار اۋدارىلدى.

«حالىقتىڭ تابىسىن ارتتىرۋ باعدارلاماسى، ازىق- تۇلىك قاۋىپسىزدىگىن قامتاماسىز ەتۋ جوسپارى جانە وڭىرلەر مەن بيزنەستى قولداۋ ءارى دامىتۋ جونىندەگى ءىس- شارالار بيۋدجەتتىڭ قاجەتتى قاراجاتىمەن نىعايتىلدى. دەپۋتاتتىق كورپۋس زاڭ شىعارۋ قىزمەتىندە مەملەكەت باسشىسىنىڭ تاپسىرمالارى مەن ول ۇسىنعان جۇيەلى رەفورمالاردى پراكتيكالىق تۇرعىدان ىسكە اسىرۋعا باسىمدىق بەردى»، - دەدى ە. قوشانوۆ.

بۇدان بۇرىن حابارلانعانداي، بۇگىنگى بىرلەسكەن وتىرىستا مەملەكەت باسشىسى قاسىم- جومارت توقايەۆتىڭ پارلامەنتكە ق ر قارۋلى كۇشتەرىنىڭ بىتىمگەرشىلىك كونتينگەنتىن ب ۇ ۇ ميسسيالارىنا جىبەرۋ تۋرالى ۇسىنىسى قارالدى.


جاڭالىقتار