تاعامعا بايلانىستى ىرىم-تىيىمدار
30 ماۋسىم 11:03

تاعامعا بايلانىستى ىرىم-تىيىمدار

نۇر- سۇلتان. قازاقپارات - ءداستۇرىن دارىپتەپ، سالتىن ساقتاعان دانا قازاق ىرىم-تىيىمدارى ارقىلى ۇرپاعىنا تاربيە بەرگەن.

قاي ىرىم، قاي تىيىم بولسىن ءومىر تاجىريبەسىنەن الىنعان. قازاق ەشقاشان ءداستۇردى اتتاپ كەتپەگەن حالىق ەكەنىن بىلەمىز. ءتىپتى، ءىشىپ وتىرعان اسىنىڭ وزىنە ەرەكشە قۇرمەتپەن قاراعان. «اسىنا قاراپ ادامىن تانى» دەپ تە بەكەر ايتىلماسا كەرەك- ءتى.

ەندەشە، دانا حالقىمىزدىڭ تاعامعا بايلانىستى ىرىم-تىيىمدارىمەن تانىس بولىڭىزدار!

1. قىزعا كارى جىلىك ۇستاتپايدى - وڭ جاقتا كوپ وتىرىپ قالادى. بالاعا مي جەگىزبەيدى - بىلجىر، ىنجىق بولادى.

2. ءدام ۇستىنە كەلىپ قالعان ادام نەمەسە ءبىر نارسە سۇراپ، انىقتاپ بىلۋگە كىرگەن ادام اسىعىس بولىپ، دامگە قارامايتىن جاعدايدا استان ۇلكەن ەمەستىگىن ءبىلدىرىپ، قانداي دا ءبىر دامنەن اۋىز ءتيىپ كەتەدى.

3. تۇزدى بەيبەرەكەت شاشپايدى، استىڭ يمانى - تۇز دەپ قارايدى.

4. ءىشىپ وتىرعان شايعا شاما تۇسسە - قوناق كەلەدى.

5. بىر جىلدا ادامنىڭ كوپتەگەن ارمان تىلەگى ورىندالىپ، ماقساتىنا جەتىپ، تابىسقا كەنەلسە، سول جىلدى قۇت جىلى ساناپ ەرەكشە ەسكە الادى. وسى جىلى قۇت-بەرەكە ورتايماسىن دەگەن ىرىممەن سول جىلدىڭ اتاۋى بولعان جانۋاردىڭ باسىنا اق قۇيىپ، ىرىم جاسايدى.

6. ەگىننىڭ تۇقىمى ءۇشىن بىرەۋ قارىزعا ءدان سۇراسا رەنجىمەي بەرەدى، ءداندى ادام ەمەس، قارا جەر تىلەپ جاتىر دەپ ىرىمدايدى.

7. ۇيگە كىرگەن جىلاندى ولتىرمەي، باسىنا ءسۇت، ايران، قۇيىپ شىعارۋ ىرىمى دا بار. بۇل جەردە اق تاعام - تازا پيعىل، اق تىلەۋدىڭ، جاقسىلىققا جورۋدىڭ سيمۆولى. كەيدە ۇيگە كىرگەن جىلاندى ولتىرمەي، باسىنا اق قۇيۋ جاماندىققا جاقسىلىقپەن جاۋاپ بەرۋدىڭ بەلگىسى سانالعان.

8. قالىپتاسقان ءداستۇر بويىنشا تاماقتى سول قولمەن جەمەيدى - سالدارى جامانشىلىققا اپارۋى كادىك.

9. حالقىمىز تۇندە تاماقتىڭ بەتىن جاۋىپ قويادى. اشىق قالسا، جامان، زۇلىم كۇش قونىپ، استى دۋالاپ كەتەدى، ونى جەگەن ادام كەسەلگە ۇشىراپ، ۇشىنىپ، دەرت جابىسۋى مۇمكىن دەپ سەنگەن.

10. ايەل ادامعا مالدىڭ قۇتى دارىسىن دەپ وڭەش بەرەدى.

Massaget.kz

جاڭالىقتار