توقايەۆ كاسپي ماڭى ەلدەرىنىڭ مادەني-گۋمانيتارلىق ىنتىماقتاستىعىن نىعايتۋدى ۇسىندى
بۇل تۋرالى ق ر پرەزيدەنتى قاسىم-جومارت توقايەۆ التىنشى كاسپي سامميتىندە ايتتى، دەپ حابارلايدى قازاقپارات ءتىلشىسى.
«كاسپي ماڭى ەلدەرى ىشىندە مادەني-گۋمانيتارلىق ىنتىماقتاستىقتى ودان ءارى نىعايتۋ قاجەتتىگى بىرنەشە رەت تالقىلانعان ەدى. وسى باعىتتا ناقتى قادامدار جاسايتىن كەز كەلدى دەپ سانايمىز. بۇل ءبىزدىڭ حالىقتارىمىزدى جاقىنداستىرىپ قانا قويماي، كاسپيدى زەرتتەۋدە دە ءوزارا ءىس-قيمىلدى ەداۋىر جاقسارتۋعا مۇمكىندىك بەرەدى»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، كاسپي ماڭى ەلدەرى اراسىنداعى كوپتەگەن حالىقارالىق الاڭداردا ساراپتامالىق دەڭگەيدە ءتيىمدى ىنتىماقتاستىق جولعا قويىلعان. سامميتتەر مەن كەزدەسۋلەر قارساڭىندا ساراپتامالىق پىكىرتالاستار بولادى.
«سونىمەن بىرگە «كاسپي بەستىگى» تالدامالىق قۇرىلىمدارىنىڭ كونسورتسيۋمىن قۇرۋ پايدالى بولادى دەپ ويلايمىن. ونىڭ ۇستىنە، مۇنداي ءوزارا ءىس-قيمىل ەكىجاقتى دەڭگەيدە تابىستى جۇرگىزىلىپ كەلەدى. قازاقستان اتا-بابالارىمىزدىڭ ورتاق يگىلىگى مەن مۇراسى - كاسپيدىڭ ءارقاشان دوستىق، تاتۋ كورشىلىك جانە ءوزارا ءتيىمدى ىنتىماقتاستىق تەڭىزى بولىپ قالا بەرۋىن قولدايتىنىن ەرەكشە اتاپ وتكىم كەلەدى. ىزگى نيەت پەن ءوزارا تالپىنىس تانىتا وتىرىپ، حالىقتارىمىز بەن ەلدەرىمىزدىڭ وركەندەۋى مەن ىلگەرىلەۋى ءۇشىن وسى يگى ماقساتقا قول جەتكىزەرىمىزگە سەنىمدىمىن»، - دەدى قازاقستان پرەزيدەنتى.