ەرلان قارين جاڭا گەوساياسي جاعدايداعى ورتالىق ازيا تۋرالى كونفەرەنتسياعا قاتىستى

نۇر-سۇلتان. قازاقپارات - ەرلان قارين حالىقارالىق كونفەرەنسياعا قاتىستى، دەپ حابارلايدى قازاقپارات اقوردانىڭ رەسمي سايتىنا سالتەمە جاساپ.

قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين قازاقستاننىڭ ستراتەگيالىق زەرتتەۋلەر ينستيتۋتى ۇيىمداستىرعان «جاڭا گەوساياسي جاعدايداعى ورتالىق ازيا ىنتىماقتاستىعى: سىن-قاتەرلەر مەن كەلەشەگى» اتتى حالىقارالىق كونفەرەنسياعا قاتىسىپ، بايانداما جاسادى.

كونفەرەنتسياعا ورتالىق ازيا ەلدەرى ستراتەگيالىق زەرتتەۋ ينستيتۋتتارىنىڭ باسشىلارى، ءوڭىر دامۋىنىڭ وزەكتى ماسەلەلەرىن زەرتتەپ جۇرگەن بەلگىلى ساراپشىلار كەلدى.

ءوز سوزىندە ەرلان قارين وسىنداي كوپجاقتى ءارى جوعارى دەڭگەيدەگى ساراپشىلار اراسىنداعى ديالوگ وڭىرلىك پروبلەمالار مەن سىناقتارعا جانە ونى شەشۋگە بايلانىستى ءبىرىڭعاي ءتاسىل ازىرلەۋگە قاتىستى ورتاق تۇسىنىك قالىپتاستىرۋعا سەپتىگىن تيگىزەتىنىن ايتتى.