اشحابادتاعى كاسپي سامميتىندە جايىقتىڭ پروبلەماسى كوتەرىلدى
29 ماۋسىم 18:42

اشحابادتاعى كاسپي سامميتىندە جايىقتىڭ پروبلەماسى كوتەرىلدى

اشحاباد. قازاقپارات – ق ر پرەزيدەنتى قاسىم-جومارت توقايەۆ التىنشى كاسپي سامميتىندە جايىقتىڭ پروبلەماسىن كوتەردى، دەپ حابارلايدى قازاقپارات ءتىلشىسى.

«كاسپيدىڭ ەكوجۇيەسىن ساقتاپ قالۋ ءبىزدىڭ ارىپتەستىگىمىزدىڭ ماڭىزدى باعىتى بولىپ قالا بەرەدى. ەكونوميكانىڭ دامۋى مەن كاسپي ماڭىنداعى ميلليونداعان تۇرعىننىڭ باقۋاتتى تىرشىلىگى ترانسشەكارالىق سۋ قويماسىنىڭ تابيعي ورتاسى قالاي ساقتالاتىنىنا بايلانىستى. جەر قويناۋىن بەلسەندى پايدالانۋ، تەڭىز ارقىلى رەسۋرستاردى تاسىمالداۋ ءوڭىردىڭ ەكولوگياسىنا سالماقتى قاتەر ءتوندىرۋى مۇمكىن»، - دەگەن پرەزيدەنت جايىقتىڭ جاعدايىنا ەرەكشە توقتالدى.

مەملەكەت باسشىسىنىڭ ايتۋىنشا، جاھاندىق جىلىنۋ سۋ رەسۋرستارىنا قاتەر ءتوندىرىپ تۇر.

«قازىر ءبىز جايىقتى قۇتقارۋ باعىتىندا كەلىسىلگەن ءارى ىقپالدى شارالار قابىلداۋىمىز كەرەك. ايتپەسە كوپ ۋاقىت وتپەي قۇتقاراتىن وزەن دە قالمايىن دەپ تۇر. تاراپتاردىڭ ءبارىن كۇش بىرىكتىرىپ، جايىقتىڭ احۋالىن جاقسارتاتىن ورتاق جوسپار قۇرۋعا شاقىرامىز»، - دەدى قاسىم-جومارت توقايەۆ.

ەسكە سالساق، بۇگىن قازاقستان پرەزيدەنتى كاسپي ماڭى مەملەكەتتەرى باسشىلارىنىڭ التىنشى سامميتىنە قاتىسۋ ءۇشىن اشحاباد قالاسىنا جۇمىس ساپارىمەن كەلدى.

ساپار اياسىندا قاسىم-جومارت توقايەۆ تۇرىكمەنستان پرەزيدەنتى سەردار بەردىمۇحامەدوۆپەن جانە تۇرىكمەنستاننىڭ بۇرىنعى پرەزيدەنتى، حالىق ءماسليحاتى ۇلتتىق كەڭەسىنىڭ ءتوراعاسى گۋربانگۋلى بەردىمۇحامەدوۆپەن كەزدەستى.

جاڭالىقتار