18:24, 29 - ماۋسىم 2022 | GMT +6
ق ر پرەزيدەنتى كاسپي جاعالاۋىنداعى ەلدەردىڭ ازىق-تۇلىك حابىن قۇرۋدى ۇسىندى
نۇر-سۇلتان. قازاقپارات - التىنشى كاسپي سامميتىندە پرەزيدەنت قاسىم-جومارت توقايەۆ تەڭىز جاعالاۋىندا ورنالاسقان ەلدەرگە وڭىرلىك ازىق-تۇلىك حابىن قۇرۋدى ۇسىندى، دەپ حابارلايدى قازاقپارات ءتىلشىسى.
«وڭىردەگى ازىق-تۇلىك قاۋىپسىزدىگىن قامتاماسىز ەتۋدىڭ ماڭىزى ارتىپ كەلەدى. بىلتىر قازاقستاننىڭ كاسپي جاعاسىنداعى ەلدەرمەن ءوزارا ساۋدا اينالىمى شامامەن 3,4 ميلليارد دوللار بولدى. ونىڭ %70 عا جۋىعى رەسەيمەن قۇرلىق ارقىلى جاسالدى»، - دەگەن قازاقستان پرەزيدەنتى وڭىردە كاسپي جاعاسىنداعى ەلدەردىڭ ازىق-تۇلىك حابىن قۇرۋدى ۇسىندى.
«قازاقستاننىڭ ەت پەن ءسۇت ونىمدەرىنىڭ ەكسپورتىن ارتتىرا الاتىنداي الەۋەتى بار. مەملەكەتتەرىمىزدىڭ ساۋدا بايلانىسىن نىعايتا ءتۇسۋ ءۇشىن زاماناۋي لوگيستيكالىق ينفراقۇرىلىمدى دا ۇدايى دامىتۋ قاجەت. سوندىقتان ءبىز كاسپي جاعالاۋىنداعى ەلدەردىڭ ازىق-تۇلىك حابىن قۇرۋدى ۇسىنامىز. ول حاب ءوزارا ساۋدا اينالىمى شىعىنىن بارىنشا ازايتۋعا مۇمكىندىك بەرەدى»، - دەدى مەملەكەت باسشىسى.