قاسىم-جومارت توقايەۆ كاسپي سامميتىنىڭ ماڭىزى تۋرالى ايتتى

اشحاباد. قازاقپارات - وڭىردە بولعان سوڭعى جاعدايلار كاسپي تەڭىزىنىڭ ماڭىزىن ارتتىردى. بۇل تۋرالى ق ر پرەزيدەنتى قاسىم-جومارت توقايەۆ التىنشى كاسپي سامميتىندە ايتتى، دەپ حابارلايدى قازاقپارات ءتىلشىسى.

«بۇرىن-سوڭدى بولماعان جاھاندىق داۋىل» جاعدايىندا كاسپي تەڭىزىنىڭ ماڭىزى ارتۋدا. ويتكەنى ونىڭ گەوستراتەگيالىق ورنالاسۋ جاعدايى، تابيعي رەسۋرستارعا بايلىعى، بىرەگەي تاسىمال الەۋەتى تارتىمدى. اقتاۋ ءسامميتى بۇكىل الەم قاۋىمداستىعىنا كاسپي جاعاسىنداعى ەلدەردىڭ اسا كۇردەلى ماسەلەلەردى بەيبىت جولمەن، تاتۋ كورشىلىك قاتىناستار ارقىلى شەشە الاتىنىن كورسەتتى»، - دەدى مەملەكەت باسشىسى.

پرەزيدەنت كاسپي تەڭىزىنىڭ قۇقىقتىق مارتەبەسى تۋرالى قۇجاتتىڭ بەكىتىلۋىن سونىڭ ايعاعى رەتىندە اتادى.

«كوپ جىلدارعا جالعاسقان كەلىسسوزدەردەن كەيىن كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلۋى وسىنىڭ ايقىن كۋاسى. بۇل قۇجات بەس جاقتى ارا-بايلانىستى كەشەندى تەرەڭدەتۋگە ىرگەتاس بولادى»، - دەدى قاسىم-جومارت توقايەۆ.