مايمىل شەشەگى قانشالىقتى قاۋىپتى؟
29 ماۋسىم 20:11

مايمىل شەشەگى قانشالىقتى قاۋىپتى؟

نۇر-سۇلتان. قازاقپارات - الەمدە مايمىل شەشەگىن جۇقتىرعاندار سانى 3 جارىم مىڭ ادامنان استى. ءبىر ناۋقاس كوز جۇمعان.

دۇنيەجۇزىلىك دەنساۋلىق ساقتاۋ ۇيىمىنىڭ مالىمدەۋىنشە، جالپى بۇل اۋرۋ 50 ەلدە انىقتالعان.

ماماندار ءتۇرلى مۋتاتسياعا ۇشىراعان مايمىل شەشەگى 12 ەسە جىلدام تارالاتىنىن العا تارتادى.

بۇل ۆيرۋس قانشالىقتى قاۋىپتى؟

مايمىل شەشەگى بيىل ويدا جوقتا ءورشىدى. زەرتتەۋشىلەر قازىر بۇل ۆيرۋستا 50 گە جۋىق جاڭا مۋتاتسيا بارىن ايتادى. ولار بۇرىن بايقالماعان. تەز تاراپ جاتقانىنىڭ سىرى دا وسىندا.

دەسە دە، جاقىندا عانا شۇعىل جينالىس وتكىزگەن دۇنيەجۇزىلىك دەنساۋلىق ساقتاۋ ۇيىمى مايمىل شەشەگىن ىندەت دەپ اتاۋدان باس تارتتى.

ويتكەنى ول حالىقارالىق دەڭگەيدە قاۋىپ ءتوندىرىپ تۇرعان جوق. ءبىراق ماماندار «بوساڭسۋعا بولمايدى، ۆيرۋستىڭ تارالۋىن ۇنەمى باقىلاۋدا ۇستاۋ قاجەت» دەيدى. ءا دەگەنشە مايمىل شەشەگى وڭتۇستىك كورەياعا جەتتى. جۇقتىرعان ازامات وسىنىڭ الدىندا گەرمانياعا بارىپ كەلگەن ەكەن.

پەڭ كيوڭ-ءران، اۋرۋلاردى باقىلاۋ جانە الدىن الۋ اگەنتتىگىنىڭ كوميسسارى:

- 2 ازامات كۇدىككە ءىلىنىپ، ولارعا تەست تاپسىرتتىق. ناتيجەسىندە ءبىر ادامنان مايمىل شەشەگى انىقتالدى. ءبىزدىڭ اگەنتتىك قاۋىپسىز ۆاكسينا سالۋدى ۇسىنادى. سونداي-اق تۇرعىنداردان تەست الۋدى كۇشەيتەمىز.

كانادا

ال كانادا بيلىگى مايمىل شەشەگىنە قارسى ۆاكتسينا سالۋدى وتكەن ايدا باستاپ كەتكەن. ءبىرىنشى كەزەكتە ەكپەنى ۆيرۋس جۇقتىرعاندارمەن قارىم-قاتىناستا بولعان ادامدار الىپ جاتىر. بۇل ەلدە وسى ساتكە دەيىن 77 جاعداي انىقتالدى.

بليتس

بۇل ۆيرۋستىڭ تەز تاراپ جاتقانىن جاقسى بىلەمىز سوندىقتان ۆاكسينا سالدىرۋعا كەلىستىم. الدىن الا ساقتانعان دۇرىس دەپ ەسەپتەيمىن. ەكپە سالدىرىپ الدىم. ەندى ەشتەڭەگە الاڭداماۋعا بولادى. وسىلايشا مايمىل شەشەگىنە قارسى كۇرەسكە ءوز ۇلەسىمدى قوسىپ جاتىرمىن. مەندە 10 كۇن ىشىندە يممۋنيتەت قالىپتاسۋعا ءتيىس.

يسپانيا

مايمىل شەشەگى افريكادا باستالعانىمەن، قازىرگى ەڭ ۇلكەن وشاعىنىڭ ءبىرى ەۋروپا بولىپ تۇر. اسىرەسە جۇقتىرعاندار يسپانيا، پورتۋگاليا مەن بريتانيادا كوپ. بۇل كوروناۆيرۋس ىندەتىنەن قورقىپ قالعان تۇرعىندار اراسىندا بەلگىلى ءبىر دەڭگەيدە دۇربەلەڭ تۋدىردى. الايدا ماماندار الاڭداۋعا نەگىز جوق دەيدى.

حۋليو گارسيا رودريگەس، ميكروبيولوگ:

ارتىق ۋايىمنىڭ تۇككە قاجەتى جوق. مايمىل شەشەگى كوۆيد سياقتى اسا قاۋىپتى ەمەس. سوندا دا ءبىز تەحنولوگيالىق جانە ۇيىمداستىرۋ جاعىنان بۇل اۋرۋعا قارسى تۇرۋعا تولىق دايىنبىز.

ا ق ش

مايمىل شەشەگى ەۋروپا ارقىلى ا ق ش- قا تارالىپ جاتىر. 10 شتاتتان 19 جاعداي انىقتالعان. ءبىراق امەريكا بيلىگى دە بۇل اۋرۋ ادام ءومىرى مەن دەنساۋلىعىنا سونشالىقتى قاۋىپتى ەمەس دەيدى.

دۇنيەجۇزىلىك دەنساۋلىق ساقتاۋ ۇيىمى ازىرگە الەم ەلدەرى اراسىنداعى بارىس-كەلىستى شەكتەۋدىڭ قاجەتى جوق دەپ ەسەپتەيدى، ءبىراق سۇتقورەكتى جانۋارلارمەن جانە كەمىرگىشتەردەن ساقتانۋعا شاقىرادى.


24.kz

جاڭالىقتار