پەتروپاۆلدىڭ اتاۋىن قىزىلجار دەپ وزگەرتەمە - اكىم جاۋابى

نۇر-سۇلتان. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ پەتروپاۆل قالاسىنىڭ اتاۋىن وزگەرتۋ تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن بريفينگىدە اكىم قۇمار اقساقالوۆقا ب ا ق وكىلدەرى وبلىس ورتالىعىنىڭ اتاۋىن قىزىلجار دەپ وزگەرتۋ مۇمكىندىگى تۋرالى سۇراق قويدى.

«ازىرشە بۇل ماسەلە كۇن تارتىبىندە تۇرعان جوق. بۇعان دەيىن دە مۇنداي سۇراقتارعا جاۋاپ بەرگەن بولاتىنمىن»، - دەگەن ءوڭىر باسشىسى وڭىردەگى ەلدى مەكەندەر مەن كوشەلەردى قايتا اتاۋ تۋرالى پايىمىن ايتتى.

«بۇل جۇمىستار بۇعان دەيىن اتقارىلىپ كەلدى، جالعاسا بەرەدى. كەيىنگى جىلدارى ءبىز 400 مىڭ نىساندى قايتا اتادىق. بۇل جۇمىس جالعاسادى، ويتكەنى مورالدىك تۇرعىدا ەسكىرگەن، ەشقانداي يدەولوگيالىق سالماعى جوق ەسكى اتاۋلار بار»، - دەدى وبلىس اكىمى.

سونداي-اق ول بۇل باعىتتاعى جۇمىستار تولىعىمەن زاڭعا ساي ەكەنىن ەسكە سالدى.

«بۇل جەردە ەشقانداي كىلتيپان جوق. بۇل - تاريحشىلاردىڭ، ولكەتانۋشىلاردىڭ زەرتتەۋلەرىنە نەگىزدەلگەن تاريحي شىندىق. قوعامدىق تىڭداۋ ءوتىپ، ءبارى زاڭ اياسىندا ىستەلىپ جاتىر»، - دەدى قۇمار اقساقالوۆ.