دەپۋتات تەرى مەن ءجۇن ەكسپورتىنا سالىناتىن كەدەندىك باجدى الىپ تاستاۋدى ۇسىندى

نۇر-سۇلتان. قازاقپارات – ق ر ءماجىلىس دەپۋتاتى سىرىم ەرتايەۆ تەرى مەن ءجۇن ەكسپورتىنا سالىناتىن كەدەندىك باجدى الىپ تاستاۋدى ۇسىندى، دەپ حابارلايدى قازاقپارات ءتىلشىسى.

«قازىرگى تاڭدا اۋىلدىق جەرلەردە ءتورت تۇلىك مالدىڭ تەرىسىن وڭدەۋگە ەشقانداي مۇمكىندىك جوق. ءبىز وعان جاقىندا بولعان حالىقپەن كەزدەسۋ بارىسىندا كوز جەتكىزدىك»، - دەيدى دەپۋتات.

ونىڭ دەرەگى بويىنشا، 2021-جىلى قازاقستاندا 130 مىڭ باس جىلقى، 1 ميلليون ءىرى قارا، 1,5 ميلليون ۇساق مال سويىلعان. ال بيىلعى 5 ايدا 60 مىڭ جىلقى، 350 مىڭ سيىر، 550 مىڭ قوي مەن ەشكى سويىلعان.

«ءبىزدىڭ زەرتتەۋىمىز بويىنشا، وسى جىلدىڭ باسىنان بەرى جىلقى تەرىسىن ەكسپورتتاۋ مۇلدەم بولعان جوق. ال ءىرى قارانىڭ 66500 تەرىسى ەكسپورتقا كەتكەن. ەشكى مەن قوي تەرىلەرى ەكسپورتكا مۇلدەم شىقپاعان، وزىمىزدە وڭدەلگەن دە جوق. حالىق، امال جوق، اۋىل ماڭىنداعى كۇل-قوقىسقا تاستاۋعا ءماجبۇر. سونىڭ سالدارىنان ەلىمىزدىڭ ەكولوگياسى زارداپ شەگۋدە. قازىرگى تاڭدا ءبىزدىڭ ەل تەرى مەن ءجۇندى ءشىرىتىپ جاتىر. سەبەبى تەرى مەن ءجۇندى ەكسپورتتاۋعا كەدەندىك باج سالىعى قويىلعان. ياعني، تەرىنى شەتەلگە ساتاتىن بولساڭ، تونناسىنا 200 ەۋرو تولەيسىڭ. سوندىقتان تەرىنى شەتەلگە شىعارۋ ءتيىمسىز بولىپ وتىر. كەدەندىك باج سالىعىن الىپ تاستاپ، شەتەلدىك نارىقتى قايتا تابۋلارىڭىز كەرەك»، - دەدى دەپۋتات.

ونىڭ پايىمىنشا، ءجۇن ەكسپورتىنا سالىناتىن %10 باج دا ارتىق.

«مىسالى، 1 ميلليون دوللارعا ءجۇن السا، 100 مىڭ دوللار تولەۋ كەرەك بولادى. مۇنداي سالىقتان كەيىن قانداي ەل ءبىزدىڭ ءتورت تۇلىك مالدىڭ ءجۇن-تەرىسىن الادى؟ تەرى مەن ءجۇن ەكسپورتىنان كەدەندىك باج سالىعىن الىپ تاستاۋ ءۇشىن ءبىرقاتار مينيسترلىك وكىلدەرىمەن حابارلاسىپ، وسى ماسەلە بويىنشا سويلەسكەندە، ءبارى «دۇرىس» دەپ قۇپتايدى، ۆەدومستۆوارالىق كوميسسيا دا تالقىلانىپ جاتقانىن ايتىپ جاۋاپ بەرەدى. ءبىراق بۇل سىزدەر تالقىلاپ جاتقاندا قورشاعان ورتا اياۋسىز لاستانىپ جاتىر»، - دەدى سىرىم ەرتايەۆ.