قازاقستان پرەزيدەنتى گۋربانگۋلى بەردىمۇحامەدوۆتى «التىن قىران» وردەنىمەن ماراپاتتادى

اشحاباد. قازاقپارات - مەملەكەت باسشىسى اشحابادقا جۇمىس ساپارى بارىسىندا تۇرىكمەنستان ۇلتتىق كەڭەسى حالىق ءماسليحاتىنىڭ ءتوراعاسى گۋربانگۋلى بەردىمۇحامەدوۆپەن كەزدەسۋ وتكىزدى، دەپ حابارلايدى قازاقپارات اقورداعا سىلتەمە جاساپ.

قازاقستان پرەزيدەنتى، ەڭ الدىمەن، گۋربانگۋلى بەردىمۇحامەدوۆتى تۋعان كۇنىمەن قۇتتىقتاپ، ونىڭ باسشىلىعىمەن تۇرىكمەنستاننىڭ قول جەتكىزگەن الەۋمەتتىك-ەكونوميكالىق جەتىستىكتەرىن اتاپ ءوتتى.

كەزدەسۋ بارىسىندا ديپلوماتيالىق قارىم-قاتىناستار ورناعان 30 جىلدىڭ ىشىندە قازاقستان مەن تۇرىكمەنستاننىڭ بايلانىسى باۋىرلاستىق ءارى ستراتەگيالىق سەرىكتەستىك دەڭگەيىنە جەتكەنى ايتىلدى.

تاراپتار ەكى ەل اراسىنداعى ساۋدا-ەكونوميكالىق، مادەني-گۋمانيتارلىق قاتىناستاردىڭ قارقىندى دامىپ كەلە جاتقانىنا توقتالدى.

قاسىم-جومارت توقايەۆ قازاق-تۇرىكمەن قارىم-قاتىناستارىنا قوسقان ولشەۋسىز ۇلەسى ءۇشىن گۋربانگۋلى بەردىمۇحامەدوۆتى قازاقستان رەسپۋبليكاسىنىڭ جوعارى مەملەكەتتىك ناگراداسى «التىن قىران» وردەنىمەن ماراپاتتادى.

سونىمەن قاتار حالىق ءماسليحاتى ءتوراعاسى رەتىندە ەلىنىڭ دامۋىنا، ايماقتىڭ تۇراقتىلىعى مەن قاۋىپسىزدىگى جولىندا ەڭبەك ەتە بەرەتىنىنە سەنىم ءبىلدىردى.