مونوپوليستەر تۇرعىن ۇيلەردى باسقارۋدىڭ جاڭا فورماسىنا كوشۋگە كەدەرگى كەلتىرىپ وتىر – م ي ب ءتوراعاسى
ورتالىق كوممۋنيكاتسيالار قىزمەتىندە وتكەن بريفينگىدە مۇلىك يەلەرى بىرلەستىگىنىڭ ءتوراعاسى ەركەبۇلان مىڭجاساروۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«نەگىزى تۇرعىندار تاراپىنان بولاتىن كەدەرگىلەر كوپ ەمەس. بۇل جەردە پرەزيدەنت ايتقانداي، سالاعا مونوپولياسىزداندىرۋ شارالارى قاجەت. مۇلىك يەلەرىنىڭ بىرلەستىگىن قۇرۋ كەزىندە مونوپليستەردىڭ جاعىنان كوپتەگەن كەدەرگىلەردى بايقادىق. مىسالى، تۇرعىن ءۇي سالۋشى كومپانيالار پاتەرلەردى جەكە مەنشىككە ساتقاننان كەيىن دە باسقارۋدى ءوز قولىنا الادى. قۇرىلىس كومپانياسىنىڭ كەپىل مەرزىمى بار. سول مەرزىم وتكەنشە وزىنە باعىنىشتى باسقارۋشى كومپانيا ارقىلى تۇرعىن ءۇيدى باسقارىپ، پاتەر يەلەرىنىڭ نىساننىڭ قانداي ساپادا سالىنعانى، ينجەنەرلىك ينفراقۇرىلىمى قانداي دەڭگەيدە تارتىلعانىن كورۋگە مۇمكىندىك بەرمەيدى»، - دەدى ول.
ايتۋىنشا، ەلدە قۇرىلىپ جاتقان مۇلىك يەلەرى بىرلەستىگى ءتوراعالارىنىڭ ەڭ ءبىرىنشى كەزدەسەتىن باستى پروبلەماسى قازىر وسى بولىپ وتىر.
«سالدارىنان جاڭا سالىنعان ۇيلەردىڭ تۇرعىندارىنىڭ مۇلىك يەلەرى بىرلەستىگىن قۇرۋعا مۇرشاسى بولمايدى. ولار ءۇيدىڭ نەگىزگى تەحنيكالىق قۇجاتتارىن الۋدان بوساي الماي جاتادى»، - دەدى م ي ب ءتوراعاسى.
ايتا كەتەيىك، ءماجىلىس ەنەرگيا ۇنەمدەۋ تۋرالى زاڭ جوباسىنا سەنات ەنگىزگەن وزگەرىستەردى قابىلداعان بولاتىن. سونىڭ اياسىندا پاتەر يەلەرى كووپەراتيۆتەرى تاعى ءبىر جىل جۇمىس ىستەيتىن بولعان ەدى.