قازاقستاندا كۇنباعىس مايىنىڭ تاپشىلىعى جوق، بولعان دا ەمەس – مينيستر

نۇر-سۇلتان. قازاقپارات – ق ر اۋىل شارۋاشىلىعى ءمينيسترى ەربول قاراشوكەيەۆ كۇنباعىس مايىن ەلدەن اكەتۋگە نە ءۇشىن شەكتەۋ قويىلعانىن ءتۇسىندىردى، دەپ حابارلايدى قازاقپارات ءتىلشىسى.

«قازاقستاندا كۇنباعىس مايىنىڭ تاپشىلىعى جوق، بولعان دا ەمەس. نەگىزى الەمدەگى داعدارىستى قاراپ وتىرساڭىز، وتكەن 3-4 ايدا كۇنباعىس مايى قىمباتتاپ كەتتى. كورشىلەس ەلدەردە ماي ەكى-ءۇش رەت قىمباتتاپ، تابىلماي حالىقتىڭ دۇرلىككەن كەزدەرى بولدى. قازاقستاندى الساق، ءبىز جىل كولەمىندە 1 ميلليون توننا كۇنباعىستى ءوزىمىز شىعارامىز جانە وڭدەيمىز. نەگىزى قازاقستانداعى كۇنباعىس مايىن قايتا وڭدەۋ زاۋىتتارى 2 ميلليون توننا كۇنباعىستى وڭدەي الادى. دەمەك، جۇكتەلىپ وتىرعان دەڭگەيى تومەن، 50 اق پايىزى تولىپ وتىر. سول سەبەپتى، ءبىز كۇنباعىس مايىنىڭ وزىنە كۆوتا ەنگىزگەن بولاتىنبىز»، - دەدى ە. قاراشوكەيەۆ ءماجىلىس وتىرىسىنان كەيىن تىلشىلەرگە بەرگەن سۇحباتىندا.

ءمينيستردىڭ ايتۋىنشا، بۇل كۆوتالار تامىزدىڭ اياعىنا دەيىن كۇشىندە بولادى، وندا 15 مىڭ توننا كۇنباعىس، 68 مىڭ توننا شيكى كۇنباعىس مايىن شىعارۋعا كۆوتا بەرىلگەن.

«ءبىز ءوز الدىمىزعا بالانستى ساقتاۋ تالابىن قويىپ وتىرمىز. بىرىنشىدەن، كۇنباعىستىڭ ءوزىن شىعارۋعا رۇقسات ەتىپ، ءوز زاۋىتتارىمىزدىڭ دا جۇكتەمەسىن قامتىپ، كۇنباعىس مايىن ءوزىمىز وندىرەتىندەي دەڭگەيگە شىعارۋ. كۇنباعىستى 1 ميلليون توننا ەمەس، 4 ميلليون توننا ەتىپ شىعارا الساق، ارينە شەكتەۋ كۆوتاسىن قويمايتىن ەدىك. سول سەبەپتى ءبىز كۆوتا ەنگىزگەندە باعاسىن مۇقيات قاراپ، شارۋالار كەلەر جىلى كۇنباعىس ەكپەي قويماسىن دەپ، بالانستى ساقتاپ وتىرمىز»، - دەدى ەربول قاراشوكەيەۆ.

ايتا كەتەيىك، ەل اۋماعىنان كۇنباعىس مايىن اكەتۋگە ەنگىزىلگەن شەكتەۋلەر 2021-جىلعى 15- جەلتوقساننان باستاپ 2022-جىلعى 1- ماۋسىمعا دەيىن قولدانىلعان ەدى. مەملەكەتتىك كىرىستەر كوميتەتى شەكتەۋ شارالارىن 31- تامىزعا دەيىن ۇزارتتى.