ەلوردا اۋەجايىندا ءۇرىمجى- نۇر-سۇلتان - ماسكەۋ باعىتىنداعى ۇشاق توقتاتىلدى
29 ماۋسىم 12:45

ەلوردا اۋەجايىندا ءۇرىمجى- نۇر-سۇلتان - ماسكەۋ باعىتىنداعى ۇشاق توقتاتىلدى

نۇر- سۇلتان. قازاقپارات - مەملەكەتتىك كىرىستەر كوميتەتى اۋە كەمەسىنىڭ نە سەبەپتى توقتاتىلعانىن ءتۇسىندىردى، دەپ حابارلايدى قازاقپارات.

«26.06.2022 كۇنى جەرگىلىكتى ۋاقىتپەن ساعات 13:40-تا ەلوردانىڭ «نۇرسۇلتان نازاربايەۆ» حالىقارالىق اۋەجايىندا «VOLGA DNEPR AIRLINES» اۋە كومپانياسىنىڭ ءۇرىمجى (ق ح ر) - نۇر- سۇلتان - ماسكەۋ باعىتىنداعى كوممەرتسيالىق رەيسىنىڭ RA-82074 ءنومىرلى اۋە كەمەسى توقتاعان. ول تۋرالى اۋەجاي قىزمەتى «اۋەجاي استانا» كەدەن بەكەتىنىڭ قىزمەتكەرلەرىنە تەز ارادا حابارلاعان. دەگەنمەن، اۋە كەمەسىنىڭ ەكيپاجى جانە ونىڭ وكىلى بەلگىلەنگەن ۋاقىت ىشىندە كەدەندىك راسىمدەۋگە قاجەتتى كەدەندىك قۇجاتتار مەن مالىمەتتەردى ۇسىنباعان. سوندىقتان، اۋە كومپانياسىنا قاتىستى ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 538-بابىمەن اكىمشىلىكتىك ءوندىرىس قوزعالدى. بۇل بۇزۋشىلىق ءۇشىن جيىرما ايلىق ەسەپ كورسەتكىش كولەمىندە ايىپپۇل قارالعان» دەلىنگەن حابارلامادا.

قازاقستان رەسپۋبليكاسىنىڭ كەدەندىك زاڭناماسىنا سايكەس، تاسىمالداۋشى نەمەسە وزگە دە بەلگىلەنگەن تۇلعالار كەلۋى تۋرالى حاباردار ەتكەن كەزدەن باستاپ ءۇش ساعات ىشىندە كولىك قۇرالىنا كەدەندىك دەكلاراتسيانى تاپسىرۋعا مىندەتتى. اۋە كومپانياسىنىڭ وكىلدەرى بۇزۋشىلىقپەن كەلىسىپ، كىنالىلەردى اكىمشىلىك جاۋاپكەرشىلىككە تارتۋ بويىنشا جۇمىس جۇرگىزىلۋدە. كىنالىلەر اكىمشىلىك جاۋاپكەرشىلىككە تارتىلىپ، كولىك قۇرالىنا كەدەندىك دەكلاراتسيانى تاپسىرۋعا قاتىستى بارلىق كەدەندىك وپەراتسيالار ورىندالعان سوڭ اۋە كەمەسى بىردەن جىبەرىلەدى. مەملەكەتتىك كىرىستەر كوميتەتىندە اتالعان زاڭ بۇزۋشىلىق كەدەندىك اكىمشىلەندىرۋ سالاسىنداعى كادىمگى اكىمشىلىك قۇقىق بۇزۋشىلىق ەكەنىن ەسكەرتىپ، ساياسي استارىنىڭ جوق ەكەنىن حابارلادى.

فوتو: airliners.net


جاڭالىقتار