كادر تاپشى وڭىرلەرگە ۇزدىك مۇعالىمدەردى تارتۋ باعدارلاماسىنا قۇجات قابىلدانىپ جاتىر

None
None
نۇر- سۇلتان. قازاقپارات - ەلىمىزدە كادر تاپشىلىعى بار وڭىرلەرگە ۇزدىك مۇعالىمدەردى تارتۋعا ارنالعان ارنايى باعدارلاماعا قاتىسۋ ءۇشىن قۇجات قابىلداۋ ءجۇرىپ جاتىر.

العاشقى اپتادا 800-دەن استام مۇعالىم ءوتىنىش بەردى، دەپ حابارلايدى ق ر وقۋ- اعارتۋ مينيسترلىگىنىڭ باسپا ءسوز قىزمەتى.

مەملەكەت باسشىسىنىڭ تاپسىرماسى بويىنشا وقۋ- اعارتۋ مينيسترلىگى مۇعالىمدەر تاپشىلىعى نەمەسە ءبىلىم ساپاسى ناشار وڭىرلەرگە ۇزدىك مۇعالىمدەردى تارتۋ ءۇشىن ارنايى باعدارلاما ازىرلەگەن بولاتىن. مۇنداي ماسەلە تۇركىستان، اتىراۋ، ماڭعىستاۋ جانە الماتى وبلىستارىندا بايقالادى.

بۇل وڭىرلەردە ماتەماتيكا، فيزيكا، حيميا، ورىس ءتىلى مەن ادەبيەتى، شەت ءتىلى مۇعالىمدەرى تاپشى. ۇزدىك پەداگوگتەردى تارتۋعا ارنالعان ارنايى باعدارلامادا مۇعالىمدەردى قولداۋعا باعىتتالعان شارالار كەشەنى بار.

اتاپ ايتقاندا، لاۋازىمدىق جالاقىنىڭ %250 مولشەرىندە ىنتالاندىرۋ تولەمدەرى، ونىڭ ىشىندە جالاقىنى كوتەرۋ، تۇرعىن ءۇيدى جالداۋ اقىسىن جانە كوممۋنالدىق تولەمدەر شىعىن وتەۋ قاراستىرىلعان.

«ارنايى باعدارلاماعا قاتىسۋ ءۇشىن قۇجاتتار 2022 -جىلعى 21- شىلدەگە دەيىن قابىلدانادى. العاشقى اپتادا پەداگوگتەردەن 800-دەن استام ءوتىنىش ءتۇستى. قاجەتتى قۇجاتتار ءتىزىمى جەرگىلىكتى اتقارۋشى ورگانداردىڭ جانە نزم اقپاراتتىق رەسۋرستارىندا ورنالاستىرىلعان. جالاقىعا قوسىلعان ۇستەمەاقىعا جالدامالى تۇرعىن ءۇي مەن كوممۋنالدىق تولەمدەردى وتەۋ كىرەدى. سونداي- اق ارنايى باعدارلاما بويىنشا ءتورت وبلىستىڭ بىرىنە قونىس اۋدارعان پەداگوگتىڭ بالالارىنا بالاباقشا مەن ورتا مەكتەپتەردەن ورىن بەرىلەدى. سونداي- اق كونكۋرستان وتكەن مۇعالىمدەرمەن 5 جىلعا ەڭبەك شارتى جاسالادى»، - دەپ اتاپ ءوتتى ق ر وقۋ- اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.

بايقاۋعا قاتىسۋ ءۇشىن ءوتىنىشتى وبلىستىڭ ءبىلىم باسقارماسىنا بەرۋگە بولادى. كونكۋرسقا تيىستى بەيىندەر بويىنشا جوعارى پەداگوگيكالىق، جوعارى كاسىپتىك بىلىمى بار، «پەداگوگ- ساراپشى»، «پەداگوگ- زەرتتەۋشى»، «پەداگوگ- شەبەر» بىلىكتىلىك ساناتتارى بار مۇعالىمدەر، سونداي- اق وقۋ ۇلگەرىمى جاقسى جوعارى وقۋ ورىندارىنىڭ پەداگوگيكا ماماندىقتارىنىڭ تۇلەكتەرى قاتىسا الادى.

كونكۋرس ەكى كەزەڭنەن تۇرادى: كومپيۋتەرلىك تەستىلەۋ جانە ەسسە جازۋ، سونىمەن قاتار اڭگىمەلەسۋ. تەستىلەۋ مەن ەسسە جازۋ ۇمىتكەردىڭ تاڭداۋى بويىنشا كومپيۋتەر فورماتىندا قازاق، ورىس نەمەسە اعىلشىن تىلدەرىندە وتەدى. ول ەلىمىزدىڭ 17 ايماعىنداعى ن ز م بازاسىندا جۇزەگە اسىرىلادى. نەگىزگى ءپان بويىنشا تەست 25 تاپسىرمادان تۇرادى، ال ەسسە كولەمى 350 ءسوز. قۇجاتتاردى قابىلداۋ تۋرالى قوسىمشا اقپاراتتى وڭىرلەردەگى Call-ورتالىق ماماندارى مەن مەكتەپكە دەيىنگى جانە ورتا ءبىلىم كوميتەتىنىڭ سايتىنان الۋعا بولادى.

سوڭعى جاڭالىقتار