دوستىق تۋرالى ءسوز
ەل اۋزىندا «سەن ماعان دوسىڭدى كورسەت، مەن ساعان كىم ەكەنىڭدى ايتامىن» دەگەن قاناتتى ءسوز بار. وزىمىزشە ومىرىمىزدەگى ساتتەردى سارالاپ، دوستىقتى ەكىگە جىكتەيمىز: ادال جانە امال دوستىق. دەگەنمەن، ءبىر قيىندىقتا قول ۇشىن سوزباعان ادامدى «ادال دوس» دەگەن اتاعىنان ايىرىپ تاستاۋعا بولا ما؟ ويلانىپ كورىڭىزشى ...
- ءسىزدى قولدايتىنىن ءارى تۇسىنەتىنىن ءبىلىپ اينالاڭىزداعى كەيبىر ادامدارعا بار سىرىڭىزدى ايتا الاسىز. ءبىراق، ول ءسىزدىڭ تۋعان كۇنىڭىزدى دە بىلمەۋى مۇمكىن. - ال، كەيبىر ادامدار ءسىز تۋرالى ءبارىن بىلەدى. ءسىز جاساعان قاتەلىكتەردى اركەز كەشىرەدى. ءبىراق، ءسىزدى قولداۋعا كەلگەندە وسالدىق تانىتادى.
- بىرەۋلەرمەن ءجيى ارالاسپايسىز، ءبىراق ءار جۇزدەسكەن سايىن ءوزىڭىزدى باقىتتى سەزىنەسىز. - كەي دوستارىڭىزدى بالا كەزىنەن بىلەسىز. ورتاداعى ۇزىلىستەرگە قاراماستان ونىمەن قارىم- قاتىناسىڭىز جاقسى.
- كەيدە ءبىر كورىپ، جاڭا تانىسقان ادامعا بىردەن باۋىر باسىپ، ءاپ- ساتتە جاقىن دوسىنا اينالاسىز.
- كەزدەسكەن ءاربىر ساتتەرىڭىز كۇلكىمەن وتەتىن، كوڭىلىڭىزدى مارقايتىپ، قۋانىش سىيلايتىن ازىلكەش دوستىرىڭىز دا بار. وسىنداي جانداردىڭ ورتاسىندا ءجۇرىپ، ءوزىڭىزدى «دوسسىز اداممىن» دەپ ەسەپتەيسىز بە؟ الدە قولداۋ تانىتا الماعاننىڭ ءبارى امال دوس پا؟
دوستىق، ماحاببات - مۇنىڭ بارلىعى قارىم- قاتىناسقا قۇرىلاتىن سەزىمدەر. قۇرامى بىردەي: شىنايىلىق، جىلۋلىق جانە سەنىم. ەگەر قاسىڭىزداعى ادامعا دەگەن سەنىمىڭىز جوعارى بولسا، ونىڭ قاسىندا ءوزىڭىزدى ەركىن سەزىنسەڭىز، «دوسىم» دەپ قورىقپاستان ايتا بەرىڭىز. ادال جانە امال ۇعىمدارىن ويلاپ تاپقان - ادامنىڭ ءوزى، ال، ءسىز تەك ءبىر عانا تۇسىنىكتى قالىپتاستىرىڭىز. ول «دوستىق» دەپ اتالسىن.
Massaget.kz