يسلام ەلدەرىنىڭ رۋحاني تۋريزم ورتالىعى بولىپ «بەس پايعامبار قالاسى» تاڭدالدى
29 ماۋسىم 08:01

يسلام ەلدەرىنىڭ رۋحاني تۋريزم ورتالىعى بولىپ «بەس پايعامبار قالاسى» تاڭدالدى

انكارا. قازاقپارات - تۇركيانىڭ شانلىۋرفا قالاسى يسلام ەلدەرىنىڭ 2023 -جىلعى تۋريستىك ورتالىعى اتالدى.

بۇل تۋرالى ازەربايجاندا وتكەن يسلام ىنتىماقتاستىعى ۇيىمىنا (ي ى ۇ) قاتىسۋشى ەلدەردىڭ تۋريزم مينيسترلەرىنىڭ 11- كونفەرەنسياسىندا بەلگىلى بولدى، دەپ حابارلايدى قازاقپارات مەنشىكتى ءتىلشىسى.

تۇركيا مادەنيەت جانە تۋريزم مينيسترلىگىنىڭ مالىمەتىنشە، باكۋدە ي ى ۇ مەملەكەتتەرى تۋريزم مينيسترلەرىنىڭ كەزەكتى كەزدەسۋى ءوتىپ، وندا شانلىۋرفا قالاسى ورتاق شەشىممەن 2023 -جىلعا رۋحاني- تۋريستىك ساياحات ورتالىعى رەتىندە تاڭدالدى.

شانلىۋرفا سيريامەن شەكارادا ورنالاسقان تۇركيانىڭ ۇلكەن قالالارىنىڭ ءبىرى. ونىڭ تاريحى يەۆرەي، حريستيان جانە يسلام دىندەرىمەن ەتەنە بايلانىستى. سول سەبەپتى ونى «بەس پايعامبار قالاسى» دەپ اتاپ كەتكەن. دەگەنمەن، بۇگىنگى كۇنى مەگاپوليس تۇتاستاي يسلام دىنىنە كوشكەن. جىل سايىن مۇندا الەمنىڭ تۇكپىر- تۇكپىرىنەن زيارات ەتۋشى مۇسىلماندار جينالادى. شانلىۋرفادا تۇرىك، كۇرد جانە اراب حالقى ارالاس تۇرادى.

ايتا كەتەيىك، ي ى ۇ اياسىندا 2024 -جىلعى رۋحاني- تۋريستىك ورتالىق رەتىندە وزبەكستاننىڭ حيۆا قالاسى تاڭدالدى.

اۆتور: ميرا تولەندى قىزى

جاڭالىقتار