احمەت بايتۇرسىن ۇلى مەن مۇحتار اۋەزوۆ اتىنداعى توسبەلگى عالىمدارعا جىل سايىن بەرىلەدى
28 ماۋسىم 21:13

احمەت بايتۇرسىن ۇلى مەن مۇحتار اۋەزوۆ اتىنداعى توسبەلگى عالىمدارعا جىل سايىن بەرىلەدى

نۇر-سۇلتان. قازاقپارات - قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين تۇركسوي حالىقارالىق ۇيىمىنىڭ باس حاتشىسى سۇلتان رايەۆتى قابىلدادى، دەپ حابارلايدى اقوردا.

كەزدەسۋدە تۇركىتىلدەس مەملەكەتتەر اراسىنداعى مادەني-گۋمانيتارلىق بايلانىستاردى ودان ءارى دامىتۋ ماسەلەسى تالقىلاندى.

ەرلان قارين ەلىمىزدىڭ رۋحانيات سالاسىندا اتقارىلىپ جاتقان جۇمىستار جايىندا ايتتى.

سونداي-اق بيىل احمەت بايتۇرسىن ۇلىنىڭ 150 جىلدىق جانە مۇحتار اۋەزوۆتىڭ 125 جىلدىق مەرەيتويلارى اياسىندا جۇزەگە اسقان ءىس-شارالارعا توقتالدى.

مەملەكەتتىك كەڭەسشى ايتۋلى تۇلعالاردىڭ اتاۋلى داتالارىن تۇركسوي شەڭبەرىندە وتكىزۋدىڭ قاجەت ەكەنىن اتاپ ءوتتى.

ءوز كەزەگىندە سۇلتان رايەۆ احمەت بايتۇرسىن ۇلى مەن مۇحتار اۋەزوۆتىڭ مەرەيتويلارىن حالىقارالىق ۇيىم اياسىندا اتاپ وتۋگە قاتىستى جوسپار قۇرىلعانىن، سول بويىنشا ءتيىستى جۇمىس جۇرگىزىلىپ جاتقانىن جەتكىزدى.

سونىمەن قاتار تەك تۇركى الەمى شەڭبەرىندەگى عانا ەمەس، حالىقارالىق دەڭگەيدەگى عالىمدار مەن زەرتتەۋشىلەرگە جىل سايىن بەرىلەتىن احمەت بايتۇرسىن ۇلى مەن مۇحتار اۋەزوۆ اتىنداعى توسبەلگى شىعارىلعانىن ايتتى.

كەزدەسۋ سوڭىندا تاراپتار جىل سوڭىندا احمەت بايتۇرسىن ۇلىنىڭ 150 جىلدىعىنا ارنالعان كەڭ كولەمدى ءىس-شارا ۇيىمداستىراتىن بولىپ ۋاعدالاستى.


جاڭالىقتار