مەملەكەتتىك تۋدان قاپ جاساپ، قوقىس تاسىعان جۇك كولىگىنىڭ ۆيدەوسى الماتىلىقتاردىڭ اشۋىنا ءتيدى

الماتى. قازاقپارات - الەۋمەتتىك جەلىدە مەملەكەتتىك تۋدان قاپشىق جاساپ، قوقىس تاسىعان جۇك كولىگىنىڭ ۆيدەوسى تارادى، دەپ حابارلايدى قازاقپارات ءتىلشىسى.

ۆيدەو اۆتورىنىڭ ايتۋىنشا، بۇل وقيعا الماتىنىڭ جەتىسۋ اۋدانىنداعى بوكەيحانوۆ كوشەسىندە سەنبىلىك ءوتىپ جاتقان جەردە بولعان.

ياعني، قوقىس شىعارۋعا ارنالعان قاپشىق ورنىنا ەلىمىزدىڭ مەملەكەتتىك تۋىن قولدانعان.

وسى وقيعاعا جەتىسۋ اۋدانىنىڭ اكىمدىگى تۇسىنىك بەردى.

«ۆيدەوداعى ارنايى تەحنيكا الماتى قالاسى جەتىسۋ اۋدانىنىڭ سانيتارلىق تازالىعىنا جاۋاپتى مەردىگەر ۇيىمداردىڭ ەشقايسىسىنا تيەسىلى ەمەس. سونداي-اق بوكەيحانوۆ كوشەسىندە جەتىسۋ اۋدانىنىڭ ۇيىمدارى سەنبىلىك وتكىزبەگەنىن حابارلايمىز. ۇسىنىلعان ۆيدەودا نۇر-سۇلتان قالاسىنا تيەسىلى ايماق-01 سەرياسىنىڭ مەملەكەتتىك ءنومىرى كورسەتىلگەن»، - دەپ جاۋاپ بەردى اكىمدىكتەن.

سونىمەن قاتار، جەتىسۋ اۋدانى اكىمدىگى نۇر-سۇلتان قالاسىنىڭ پوليتسيا دەپارتامەنتىنەن اۆتوكولىگىنىڭ كىمگە تيەسىلى ەكەنىن انىقتاۋدى ءوتىندى.

«ءوز كەزەگىمىزدە ءبىز ۆيدەو اۆتورىن جالعان اقپارات بەرگەنى ءۇشىن جاۋاپكەرشىلىككە تارتۋ ءۇشىن الماتى قالاسىنىڭ پوليتسيا دەپارتامەنتىنە ارىز تۇسىردىك»، - دەپ اتاپ ءوتتى الماتى قالاسى جەتىسۋ اۋدانى اكىمدىگىنىڭ وكىلدەرى.

ايتا كەتەيىك، قازاقستاندىقتارعا 2020-جىلعا دەيىن تۋدى ءتىپتى بالكونعا ىلۋگە رۇقسات ەتىلمەگەن ەدى.

ءبىراق ارتىنشا قازاقستاندىقتاردىڭ زاڭدى قايتا قاراۋ كەرەك دەگەن وتىنىشىنەن كەيىن تۋدى قولدانۋ ەرەجەلەرى قايتا بەكىتىلدى.