رەسەي ەۋروبوندتار بويىنشا دەفولتقا ۇشىرادى
28 ماۋسىم 15:57

رەسەي ەۋروبوندتار بويىنشا دەفولتقا ۇشىرادى

ماسكەۋ. تاسس - قازاقپارات - Moody's اگەنتتىگى رەسەيدىڭ سىرتقى قارىز مىندەتتەمەلەرىن ورىنداماعانى تۋرالى حابارلادى.

بۇل تۋرالى حالىقارالىق رەيتينگ اگەنتتىگىنىڭ سايتىنداعى حابارلامادا ايتىلعان، دەپ جازادى قازاقپارات تاسس اقپارات اگەنتتىگىنە سىلتەمە جاساپ.

«27- ماۋسىمدا رەسەيدىڭ ەگەمەندىك قارىزىن ۇستاۋشىلار ەۋرووبليگاتسيالار شىعارىلىمى بويىنشا («رەسەي-26» جانە «رەسەي-36» - تاسس) 30 كۇندىك جەڭىلدىكتى كەزەڭ اياقتالعانعا دەيىن 100 ميلليون دوللار كولەمىندەگى كۋپوندىق تولەمدەردى العان جوق. بۇل ءبىزدىڭ انىقتامامىز بويىنشا دەفولتتى بىلدىرەدى»، - دەپ كەلتىرەدى تاسس رەيتينگ اگەنتتىگىنىڭ جازباسىن.

وتكەن ايدا ا ق ش رەسەيگە سىرتقى قارىزىنا قىزمەت كورسەتۋگە تولەم جاساۋعا مۇمكىندىك بەرەتىن باس ليتسەنزيانى ۇزارتقان جوق. وسىلايشا، رەسەي قارىزدى وتەۋ ءۇشىن وتكەن اپتادا مۇنداي تولەمدەردى جۇزەگە اسىرۋعا مۇمكىندىك بەرەتىن جاڭا مەحانيزمدى قولدانا وتىرىپ، العاش رەت رۋبلدەگى ەۋرووبليگاتسيالار بويىنشا مىندەتتەمەلەرىن ورىندادى.

رەسەي قارجى ءمينيسترى انتون سيلۋانوۆتىڭ بەيسەنبى كۇنى اتاپ وتكەنىندەي، بۇل سىرتقى قارىز بويىنشا دەفولتقا ۇشىراۋدى بىلدىرمەيدى - كرەديتورلاردىڭ ماسكەۋ ءوز مىندەتتەمەلەرىن دۇرىس ورىنداماي جاتىر دەپ پايىمداۋعا نەگىز جوق، ويتكەنى رەسەي فورس-ماجورلىق جاعدايدا كرەديت بەرۋشىلەردىڭ ءوز قارىزدارىن الۋى ءۇشىن ءبارىن جاساپ وتىر.

سيلۋانوۆتىڭ ايتۋىنشا، ا ق ش پەن ەۋرووداق رەسەيدىڭ سىرتقى قارىزىنا «دەفولت» بەلگىسىن قويۋ ءۇشىن وعان قىزمەت كورسەتۋگە جاساندى كەدەرگىلەر جاساۋدا.

ءوز كەزەگىندە Moody's بولاشاق كۋپوندىق تولەمدەر بويىنشا دەفولتتى جوققا شىعارمايدى.

«رەسەي پرەزيدەنتىنىڭ 22- ماۋسىمداعى جارلىعىمەن سىرتقى قارىزدى رۋبلمەن تولەۋ ءتارتىبى ەنگىزىلدى. ءبىز شارتتىق تالاپتارعا سايكەس مۇنداي نوميناتسياعا جول بەرمەيتىن وبليگاتسيالار ءۇشىن رۋبلدەگى تولەمدەردى دەفولت رەتىندە قاراستىرامىز دەپ ويلادىق»، - دەلىنگەن تاسس كەلتىرىپ وتىرعان Moody's مالىمدەمەسىندە.

وندا رەسەيدىڭ 2018-جىلدان كەيىن شىعارعان ەۋروبوندتاردى بەلگىلى ءبىر شارتتاردا رۋبلمەن وتەۋگە مۇمكىندىك بەرەتىنىن قوستى.

دەگەنمەن، 2018-جىلعا دەيىن شىعارىلعان ەۋرووبليگاتسيالار بۇل ەرەجەنى قامتىمايدى نەمەسە تەك دوللار، ەۋرو، فۋنت ستەرلينگ، شۆەيتساريالىق فرانك سياقتى ۆاليۋتادا وتەۋگە رۇقسات بەرەدى.

جاڭالىقتار