بانك كليەنتتەرىنە قاتىستى الاياقتىق جيىلەپ كەتتى - ۇكىمەت باسشىسى
28 ماۋسىم 15:10

بانك كليەنتتەرىنە قاتىستى الاياقتىق جيىلەپ كەتتى - ۇكىمەت باسشىسى

نۇر-سۇلتان. قازاقپارات – ق ر پرەمەر-ءمينيسترى ءاليحان سمايىلوۆ مەملەكەتتىك قىزمەتتەردى سيفرلاندىرۋ جۇمىستارىن جالعاستىرۋدى تاپسىردى، دەپ حابارلايدى قازاقپارات ءتىلشىسى.

«حالىقتىڭ تۇرمىس دەڭگەيى مەملەكەتتىك قىزمەتتەردىڭ قولجەتىمدى بولۋىنا جانە ولاردىڭ ساپاسىنا بايلانىستى. سوندىقتان، بۇل سالادا سەرۆيستى ۇنەمى جەتىلدىرە وتىرىپ، ازاماتتارعا ىڭعايلى ءارى ساپالى قىزمەتتەردى ۇسىنۋدىڭ ماڭىزى وتە زور. سوڭعى ءبىر جىلدا كورسەتىلەتىن مەملەكەتتىك قىزمەتتەردىڭ سانى 2 ەسەگە جۋىق ءوستى. ەلەكتروندىق فورماتتاعى قىزمەتتەردىڭ دەڭگەيى %93 قۇرايدى. ال قىزمەتتەردىڭ %66- ىن ازاماتتار كادىمگى سمارتفون ارقىلى الىپ وتىر»، - دەدى ءا. سمايىلوۆ ۇكىمەتتىڭ بۇگىنگى وتىرىسىندا.

ونىڭ ايتۋىنشا، ازاماتتىڭ جەكە باسىنا قاتىستى 18 قۇجات ءتۇرى سيفرلىق فورماتتا بەرىلەدى، ياعني ولاردى قاعاز جۇزىندە راستاۋدىڭ قاجەتى جوق.

«ەلەكتروندىق قىزمەتتەر مەن بازالاردىڭ ينتەگراتسياسى ازاماتتاردىڭ ءومىرىن جەڭىلدەتۋگە مۇمكىندىك بەردى. ولار مەملەكەتتىك ورگانداردىڭ ەسىگىن توزدىرىپ، قاعازباستىلىققا سالىنىپ، اۋرەگە تۇسپەيدى. بۇل جۇمىستى ءارى قاراي كەڭەيتۋ قاجەت. سونىمەن قاتار، ەلىمىزدە ەلەكتروندىق فورماتتاعى بانكتىك قىزمەت تۇرلەرى جاقسى دامىپ كەلەدى. ازاماتتارعا ىڭعايلى بولۋى ءۇشىن بانك قوسىمشالارىندا مەملەكەتتىك قىزمەت سەرۆيستەرى ەنگىزىلۋدە ولاردا ەڭ جوعارى دەڭگەيدەگى زاماناۋي قورعاۋ تاسىلدەرى، بيومەتريا قولدانىلۋدا»، - دەدى پرەمەر-مينيستر.

دەگەنمەن، ۇكىمەت باسشىسى بانك كليەنتتەرى ءۇشىن الاياقتىق جاعدايلاردىڭ جيىلەپ كەتكەنىنە بارىنشا نازار اۋدارىپ، كليەنتتەردىڭ دەرەكتەرىن قورعاۋدى كۇشەيتۋدى تاپسىردى.

جاڭالىقتار