پەتروپاۆلدا ءدامحانادا ءۇش ادامدى پىشاقتاعان كۇدىكتى سۋيتسيد جاسادى
28 ماۋسىم 07:56

پەتروپاۆلدا ءدامحانادا ءۇش ادامدى پىشاقتاعان كۇدىكتى سۋيتسيد جاسادى

پەتروپاۆل. قازاقپارات - پەتروپاۆلداعى ءدامحانالاردىڭ بىرىندە دەمالۋشىلار اراسىندا جانجال شىعىپ، سالدارىنان قالانىڭ ءۇش تۇرعىنى اۋىر جاراقاتتاندى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 11-ماۋسىمدا تۇندە پوليتسياعا پەتروپاۆلداعى بەرەكە ىقشاماۋدانى ىبىرايەۆ كوشەسىنىڭ بويىنداعى اۋلادا قالانىڭ ءۇش تۇرعىنىنا پىشاق سالىنعانى تۋرالى شاقىرۋ ءتۇستى.

كۇدىكتىلەر وقيعا ورنىنان قاشىپ كەتكەن. زارداپ شەككەن 29، 32 جانە 34 جاستاعى قالا تۇرعىندارى اۋرۋحاناعا جەتكىزىلدى. جەدەل ءىس- شارالار بارىسىندا پوليتسەيلەر 35 پەن 43 جاستاعى كۇدىكتى ەكى ەر ادامدى انىقتادى.

اتالعان فاكتى ق ر قىلمىستىق كودەكسىنىڭ 24-بابىنىڭ 3-بولىگى، 99-بابىنىڭ 2-بولىگى «ادام ولتىرۋگە وقتالۋ» بويىنشا قىلمىستىق قۇقىق بۇزۋشىلىق بەلگىلەرىنىڭ قۇرامىمەن سوتقا دەيىنگى تەرگەپ- تەكسەرۋلەردىڭ ءبىرىڭعاي تىزىلىمىنە ەنگىزىلدى.

الدىن الا تەرگەۋ بارىسىندا پەتروپاۆلداعى ءدامحانالاردىڭ بىرىندە دەمالۋشىلاردىڭ اراسىندا جانجال تۋىنداعانى بەلگىلى بولدى.

كۇدىكتىلەردىڭ ءبىرى پەتروپاۆل قالالىق پوليتسيا باسقارماسىنىڭ ۋاقىتشا ۇستاۋ يزولياتورىندا سۋيتسيد جاسادى. اتالعان فاكتى ق ر قىلمىستىق كودەكسىنىڭ 105-بابى بويىنشا تىركەلدى.

اۆتور: اقەركە داۋرەنبەك قىزى

جاڭالىقتار