پرەزيدەنتتىڭ ءىس باسقارۋشىسى ت ر ك قىزمەتكەرلەرىن جۋرناليستەر كۇنىمەن قۇتتىقتادى
27 ماۋسىم 20:56

پرەزيدەنتتىڭ ءىس باسقارۋشىسى ت ر ك قىزمەتكەرلەرىن جۋرناليستەر كۇنىمەن قۇتتىقتادى

نۇر-سۇلتان. قازاقپارات – ق ر پرەزيدەنتى ءىس باسقارماسىنىڭ باسشىسى ايبەك دادەبايەۆ قازاقستان جۋرناليستەرىنىڭ كاسىبي مەرەكەسى - بۇقارالىق اقپارات قۇرالدارى قىزمەتكەرلەرى كۇنى قارساڭىندا پرەزيدەنت تەلەراديوكەشەنىنىڭ قىزمەتكەرلەرىمەن كەزدەستى، دەپ حابارلايدى قازاقپارات ءتىلشىسى.

ايبەك دادەبايەۆ مەملەكەت باسشىسىنىڭ جۇمىسىن، قوعامدىق-ساياسي جانە الەۋمەتتىك-ەكونوميكالىق سالالاردى ودان ارى جاڭعىرتۋ باعىتىندا بەرگەن تاپسىرمالارى مەن باستامالارىن جۇزەگە اسىرۋ بارىسىن اقپاراتتىق قولداۋداعى تەلەراديوكەشەننىڭ ءرولى ماڭىزدى ەكەنىن باسا ايتتى.

ت ر ك باس ديرەكتورى راۋشان قاجىبايەۆا تەلەراديوكەشەندى جاڭعىرتۋ ناتيجەسى جايىندا ايتىپ بەردى.

بيىل ت ر ك قۇرامىنا «قازاقپارات» حالىقارالىق اقپارات اگەنتتىگى، «Kazakh TV» حالىقارالىق سپۋتنيكتىك تەلەارناسى جانە Kaztube ۇلتتىق ۆيدەو-حوستينگى كىردى.

قازىرگى ۋاقىتتا ق ر پرەزيدەنتىنىڭ تەلەراديوكەشەنى وتاندىق جانە حالىقارالىق اقپاراتتىق كەڭىستىكتە قىزمەت اتقاراتىن تولىققاندى ءىرى قازاقستاندىق مەديا-كومپانياعا اينالدى.

كەزدەسۋ بارىسىندا ت ر ك قىزمەتكەرلەرى ق ر پرەزيدەنتى ءىس باسقارماسىنىڭ باستىسى ايبەك دادەبايەۆپەن ەمەن-جارقىن اڭگىمەلەسىپ، وزدەرىن تولعاندىرعان ساۋالدارعا تولىققاندى جاۋاپ الدى.

اتاپ ايتقاندا، الەۋمەتتىك-ەڭبەك ماسەلەلەرى، الەۋمەتتىك كەپىلدىكتەر مەن جەڭىلدىك بەرۋ، قىزمەتكەرلەردىڭ مۇددەسىن قورعاۋ، ت ر ك قىزمەتكەرلەرىن كاسىبي تۇرعىدا ىلگەرىلەتۋ جايتتارى تالقىعا ءتۇستى.

كەزدەسۋ سوڭىندا ايبەك دادەبايەۆ ت ر ك ۇجىمىن كاسىبي مەرەكەسىمەن قۇتتىقتاپ، ق ر پرەزيدەنتى ءىس باسقارماسى اتىنان العىس حات تابىستادى.

جاڭالىقتار