بيىل اقمولا وبلىسىندا ءبىر مىڭ شاقىرىم جول جوندەلەدى
27 ماۋسىم 18:30

بيىل اقمولا وبلىسىندا ءبىر مىڭ شاقىرىم جول جوندەلەدى

بۋراباي. قازاقپارات - بيىل اقمولا وبلىسىندا ءبىر مىڭ شاقىرىم جول جوندەلەدى.

بۇل تۋرالى 2022-جىلدىڭ 5 ايىنىڭ قورىتىندىسى بويىنشا ءوڭىردىڭ الەۋمەتتىك-ەكونوميكالىق دامۋىنا ارنالعان باسپا ءسوز ءماسليحاتىندا ايماق باسشىسى ەرمەك مارجىقپايەۆ ءمالىم ەتتى، دەپ حابارلايدى قازاقپارات ءتىلشىسى.

اكىمنىڭ ايتۋىنشا، وڭىردە كولىك كوممۋنيكاتسيالارىن ءتيىستى جاعدايدا ۇستاۋ بويىنشا ماقساتتى جۇمىستار جۇرگىزىلۋدە.

قالالار مەن اۋداندارداعى جەرگىلىكتى ماڭىزى بار، سونداي-اق وبلىستىق جانە رەسپۋبليكالىق ماڭىزى بار اۆتوجولدار جوندەلمەكشى.

«وتكەن جىلى جەرگىلىكتى ماڭىزى بار اۆتوجولداردى سالۋعا، جوندەۋگە 232 جوبا بوينىشا 38 ميلليارد تەڭگە قارجى ءبولىندى، ونىڭ ىشىندە 172 جوبا بويىنشا جۇمىستار اياقتالدى. وبلىستىق، اۋداندىق ماڭىزى بار 800 كيلومەتر اۆتوجول جانە ەلدى مەكەندەردىڭ كوشە-جول جەلىسى جوندەلدى. بيىل 1 مىڭ كيلومەتر جول جەلىسىن جاقسارتۋدى جوسپارلاپ وتىرمىز. ناتيجەسىندە جاقسى جانە قاناعاتتانارلىق جاعدايداعى جەرگىلىكتى ماڭىزى بار اۆتوجولداردىڭ ۇلەسى 87 پايىزعا جەتەدى»، - دەپ اتاپ ءوتتى ەرمەك مارجىقپايەۆ.

ايتا كەتسەك، 2016-جىلدان باستاپ جول قۇرىلىسى مەن جوندەۋ جۇمىستارىنىڭ كولەمى 4 ەسەگە ارتتى. 7 جىل بۇرىن جىلىنا 162 شاقىرىم جول جوندەلسە، 2021-جىلى بۇل كورسەتكىش 790 شاقىرىمدى قۇرادى.

جاڭالىقتار