كوللەدجدەرگە قۇجات قابىلداۋ باستالدى
بالالار جىلىندا 128 مىڭ گرانت ءبولىنىپ، رەكوردتىق كورسەتكىشكە جەتتى. بۇل بىلتىرمەن سالىستىرعاندا 45 مىڭعا ارتىق.
بۇل تۋرالى قازاقپارات وقۋ-اعارتۋ مينيسترلىگىنە سىلتەمە جاساپ حابارلايدى.
ءبىلىم بەرۋ گرانتتارىنىڭ باسىم بولىگى تەحنيكالىق ماماندىقتارعا بولىنەدى: IT، قۇرىلىس، ينجەنەريا، مەتاللۋرگيا. تاعى ءبىر جاعىمدى جاڭالىق بار. ەندى الداعى وقۋ جىلىندا قازاقستاندىق كوللەدجدەر «روبوتوتەحنيكا جانە كىرىكتىرىلەتىن جۇيەلەر»، «ادديتيۆ ءوندىرىسى تەحنولوگيالارى»، «عيماراتتاردى جوبالاۋ مەن پايدالانۋدىڭ اۆتوماتتاندىرىلعان جۇيەلەرى»، «گرافيكا جانە مۋلتيمەديا ديزاينى»، «لاندشافت ديزاينى» جانە باسقا دا جاڭا ماماندىقتار بويىنشا كادرلار دايارلاۋدى باستايدى.
تالاپكەرلەرگە ىڭعايلى بولۋ ءۇشىن قۇجاتتاردى قابىلداۋ ءۇردىسى اۆتوماتتاندىرىلدى. قۇجاتتار Egov.kz ەلەكتروندى ۇكىمەت پورتالى ارقىلى قابىلدانىپ جاتىر. سونداي-اق قابىلداۋ كوللەدجدەردە ءداستۇرلى قاعاز فورماتىندا دا جۇزەگە اسىرىلادى. بۇدان بىلاي تالاپكەرلەر بىردەن 4 ماماندىقتى تاڭداپ، ەلىمىزدىڭ 4 كوللەدجىنە قۇجات تاپسىرا الادى.
2021-جىلى ءبىلىم بەرۋدىڭ اشىقتىعى مەن قولجەتىمدىلىگىن قامتاماسىز ەتۋ ءۇشىن مينيسترلىك «اقشا ستۋدەنتتىڭ سوڭىنان جۇرەدى» قاعيداتى بويىنشا مەملەكەتتىك تاپسىرىستاردى ءبولۋدىڭ جاڭا مەحانيزمىن ەنگىزدى.
بۇعان دەيىن گرانتتاردى كوللەدجدەر اراسىندا ءبىلىم باسقارمالارى ورنالاستىرىپ كەلسە، ەندى مەملەكەتتىك تاپسىرىس تالاپكەرلەردىڭ تاڭداۋى بويىنشا بولىنەدى. ياعني تۇلەك قايدا وقۋعا تۇسكىسى كەلسە، بيۋدجەت اقشاسى سول جەرگە جىبەرىلەدى.
«بۇگىنگى تاڭدا 9-سىنىپ تۇلەكتەرىنىڭ %70 عا جۋىعى ەلىمىزدىڭ كوللەدجدەرىندە مەملەكەت ەسەبىنەن تەگىن وقىپ جاتىر. بيىل مەملەكەتتىك تاپسىرىستى 45 مىڭ ورىنعا كوبەيتتىك. سونداي-اق مينيسترلىك جۇمىسقا ورنالاستىرۋ مىندەتتەمەسىمەن كاسىپورىنداردىڭ سۇرانىسى بويىنشا كادرلاردى ماقساتتى دايارلاۋدى ەنگىزدى. ياعني قازىردىڭ وزىندە بالالاردىڭ جۇمىسقا ورنالاسۋىنا كەپىلدىك بەرىلەدى. بۇل ەڭبەك نارىعىنىڭ سۇرانىسىنا ساي مامانداردى شىعارۋعا جانە ولاردى دايارلاۋ ساپاسىن ارتتىرۋعا مۇمكىندىك بەرەدى. مەملەكەتتىك تاپسىرىستى ورنالاستىرۋداعى اشىقتىق بارلىعىنا تەحنيكالىق جانە كاسىپتىك ءبىلىمنىڭ قولجەتىمدىلىگىن قامتاماسىز ەتەدى جانە كوللەدجدەر اراسىنداعى باسەكەلەستىكتى ارتتىرادى»، - دەپ ءتۇسىندىردى ق ر وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
ورتا بۋىن جانە قولدانبالى باكالاۆر ماماندىقتارىنا تۇسەتىن تالاپكەرلەر اراسىندا ىرىكتەۋ ءبىلىم باسقارمالارىنىڭ اقپارات جۇيەسى ارقىلى جۇرگىزىلەدى. كونكۋرس سەرتيفيكاتتىڭ مىندەتتى جانە بەيىندىك پاندەرىنىڭ ورتاشا بالى بويىنشا وتكىزىلەدى.
جۇمىسشى ماماندىعىن العىسى كەلەتىن ورتا مەكتەپ تۇلەكتەرى، سونداي-اق ەرەكشە ءبىلىم بەرۋ قاجەتتىلىگى بار بالالار كوللەدجگە اڭگىمەلەسۋ قورىتىندىسى بويىنشا قابىلدانادى.
ولار Egov.kz ارقىلى ونلاين ءوتىنىش بەرە الادى نەمەسە قۇجاتتاردى تىكەلەي كوللەدجگە تاپسىرا الادى.
پەداگوگيكالىق، مەديتسينالىق جانە شىعارماشىلىق ماماندىقتارعا تۇسەتىن تۇلەكتەر ارنايى نە بولماسا شىعارماشىلىق ەمتيحاندار تاپسىرادى نەمەسە اڭگىمەلەسۋدەن وتەدى. ولاردى كوللەدجدەردىڭ قابىلداۋ كوميسسيالارى جۇرگىزەدى.
مەملەكەتتىك تاپسىرىس بويىنشا 9-سىنىپ تالاپكەرلەرى اراسىنداعى كونكۋرس 19-22- تامىز ارالىعىندا وتەدى. ال 11-سىنىپ جانە كوللەدج تۇلەكتەرى اراسىنداعى بايقاۋ 22-25- تامىز ارالىعىندا وتەدى.
ونەر جانە مادەنيەت ماماندىقتارىنا تۇسەتىندەر ءۇشىن بايقاۋ 29- شىلدە مەن 2- تامىز ارالىعىندا وتەدى.
بىلتىردان باستاپ كۆوتا ساناتتارىنىڭ ءتىزىمى كەڭەيتىلگەنىن دە اتاپ وتەيىك.
«كۆوتا 9 ساناتقا بەرىلەدى. كوپ بالالى وتباسى بالالارى ءۇشىن %5، كەمىندە ءۇش جىل تولىق ەمەس وتباسى مارتەبەسى بار وتباسى بالالارى ءۇشىن - %1، بالا كەزىنەن مۇگەدەك بالالاردى تاربيەلەپ وتىرعان وتباسىلاردان شىققان بالالار، 1 جانە Ⅱ توپتاعى مۇگەدەكتەر ءۇشىن - %1 كۆوتا ەنگىزىلدى. ۇپايلار تەڭ بولعان جاعدايدا كۆوتا ساناتى مەن سەرتيفيكاتتىڭ ورتاشا بالى ەسەپكە الىنادى»، - دەپ اتاپ ءوتتى ناسىمجان وسپانوۆا.