اقتوبە كومانداسىنىڭ ويىنىن سىعالاپ وتىرىپ كورگەن جىگىتكە كلۋب شەكسىز ابونەمەنت بەرمەك

اقتوبە. قازاقپارات - ورتالىق ستاديونعا كىرە الماعان جانكۇيەر «اقتوبە» - «استانا» ماتچىن ستاديون سىرتىنان سىعالاپ تاماشالاعان. قازىر جىگىتتى فۋتبول كلۋبى ىزدەستىرىپ جاتىر، دەپ حابارلايدى قازاقپارات ءتىلشىسى.

«قازىر ءبىز ورتالىق ستاتسيونعا كىرە الماي، ويىندى سىرتتان تاماشالاعان جىگىتتى ىزدەستىرىپ جاتىرمىز. تەك «استانامەن» بولعان ماتچتا ەمەس، نەگىزى ءار ويىندا ستاديون لىق تولادى. ال بۇل ماتچ قازاقستاننىڭ بىرنەشە دۇركىن چەمپيونى بولعان ەكى مىقتى كوماندانىڭ ويىنى. سوندىقتان جەكسەنبى كۇنى بولاتىن ويىن بيلەتى سارسەنبىدەن باستاپ ساتىلىمعا شىعارىلدى. بىرەر كۇن ىشىندە ەلەكتروندى بيلەت تۇگەل ساتىلىپ كەتتى. ال قاعاز جۇزىندەگى بيلەت كاسساعا سول كۇنى ءتۇستى، ول دا لەزدە ءوتىپ كەتتى. ماتچتى سىرتتان تاماشاعان جىگىت تۋرالى ايتار بولساق، قازىر ىزدەپ جاتىرمىز. وعان «اقتوبە» ف ك بارلىق ويىندارىنا ارنالعان ماۋسىمدىق ابونەمەنتتى سىيعا بەرگىمىز كەلەدى. وبلىس اكىمى وڭداسىن ورازالين ونىڭ فوتوسىن كورىپ، كلۋبقا شىن جاناشىر جانكۇيەرگە سىي جاساۋعا تاپسىرما بەردى»، - دەدى «اقتوبە» ف ك مەديا- وفيتسەرى اسەت جومارت.

ايتا كەتەيىك، كەشە فۋتبولدان ەل بىرىنشىلىگىندە «استانا» ويسىراي جەڭىلدى. كەزدەسۋ بارىسىندا اقتوبەلىك فۋتبولشىلار جيناقى قيمىل كورسەتتى. ناتيجەسىندە 18-مينۋتتا ۆيدەمونت ۋگو ەسەپ اشسا، شينا 33-مينۋتتا باسىمدىقتى ارتتىرا ءتۇستى. وعان ەلوردالىق كلۋبتان اسلان دارابايەۆ 43-مينۋتتا ءبىر گولمەن جاۋاپ قايىردى. ويىننىڭ 73-مينۋتىندا اقتوبەلىك كلۋبتان الىبەك قاسىم پەنالتيدى مۇلتىكسىز ورىنداسا، ماكسيم سامورودوۆ 95-مينۋتتا قورىتىندى ەسەپتى بەلگىلەدى. وسىلايشا «استانا» قارسىلاسىنا 1:4 ەسەبىمەن ەسە جىبەردى.

اۆتور: التىناي ساعىندىقوۆا