پاتەردەگى تۇرعىنداردى بانك قوسىمشاسى ارقىلى تىركەۋدەن شىعارۋعا بولادى
بۇل تۋرالى ق ر ىشكى ىستەر مينيسترلىگىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى قازاقپارات ءتىلشىسى.
«ەندى ءبىر باسپانادا تىركەلگەن ادامداردىڭ سانىن Halyk Homebank قوسىمشاسى ارقىلى تەكسەرۋگە بولادى. سونىمەن قاتار، اتالعان قوسىمشادا پاتەردەگى تۇرعىنداردى تىركەۋدەن شىعارۋ مۇمكىندىگى قاراستىرىلاتىن بولادى»، - دەدى شۇعىلا تۇرلىبەك مينيسترلىكتىڭ باسپا ءسوز الاڭىندا وتكەن بريفينگ بارىسىندا.
اتاپ ايتقاندا، بۇل قىزمەت «تىركەۋدەن شىعارۋ» بولىمىندە ىسكە قوسىلادى. وسى قىزمەت ءتۇرى تەك قازاقستان ازاماتارىنا، ياعني جىلجىمايتىن مۇلىك يەلەرىنە ارنالعان. جاڭا قىزمەت سيفرلىق بانك مۇمكىندىكتەرىن كەڭەيتۋ اياسىندا ىشكى ىستەر مينيسترلىگىنىڭ، سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگىنىڭ قولداۋ جاساۋى ارقىلى ەنگىزىلىپ جاتىر. بۇدان بۇرىن حابارلانعانداي، بۇگىنگى بريفينگ بارىسىندا ءبىر اپتادا قازاقستاندا 3 مىڭعا جۋىق قىلمىس تىركەلگەنى ايتىلدى.
اۆتور: رۋسلان عابباسوۆ