گەرمانيادا ۇلكەن جەتىلىك سامميتى وتۋدە
27 ماۋسىم 08:56

گەرمانيادا ۇلكەن جەتىلىك سامميتى وتۋدە

نۇر- سۇلتان. قازاقپارات - وسى جولى ۇلى بريتانيا، گەرمانيا، يتاليا، كانادا، فرانسيا، جاپونيا مەن ا ق ش ەلدەرىنىڭ باسشىلارى ەلماۋ قالاسىندا باس قوستى، دەپ حابارلايدى «حابار 24».

ال ەۋرووداقتىڭ وزگە ەلدەرىنىڭ اتىنان ەۋروپالىق كەڭەس باسشىسى شارل ميشەل مەن ەۋروپالىق كوميسسيا پرەزيدەنتى ۋرسۋلا فون دەر ليايەن قاتىستى.

ساميتتە جوسپارلانعان 7 جۇمىس سەسسياسىندا جاھاندىق ەكونوميكا، ساميتتە قاتىسۋشى ەلدەردىڭ ىنتىماقتاستىعى، سىرتقى ساياسات پەن قاۋىپسىزدىك، سونىمەن قاتار ازىق- تۇلىك داعدارىسى مەن وزگە دە وزەكتى ماسەلەلەر پىسىقتالماق. القالى جيىننىڭ ءبىرىنشى كۇنى ۋكرايناداعى قارۋلى- قاقتىعىس جان- جاقتى تالقىلاندى. ساياساتكەرلەر كيەۆكە كورسەتىلەتىن كومەكتىڭ مەرزىمسىز بولاتىنىن جاريا ەتتى. سامميتكە جينالعاندار جاھانداعى ينفلياتسيانىڭ شارىقتاۋى مەن ەكونوميكالىق داعدارىستىڭ ۋشىعۋىنا الاڭداۋشىلىق ءبىلدىردى.

ۋرسۋلا فون دەر لەيەن، ەۋروپالىق كوميسسيا پرەزيدەنتى:

- الەمدىك ەكونوميكا ەندى قالپىنا كەلە باستاعاندا رەسەي ۋكرايناعا باسىپ كىردى. قارۋلى- قاقتىعىس بارلىق مەملەكەتتەردە قىمباتشىلىققا اكەپ سوقتى. قازىر ازىق- تۇلىكتەن باستاپ ەنەرگيا تاسىمالداۋشىلاردىڭ ءبارى قىمبات.

ولاف شولتس، گەرمانيا كانسلەرى:

- ۇلكەن جەتىلىك ەلدەرى ەكونوميكانىڭ قۇلدىراۋى، ينفلياتسيانىڭ شارىقتاۋى، شيكىزات تاپشىلىعى مەن جاھاندىق لوگيستيكانىڭ بۇزىلۋى سياقتى سان ءتۇرلى ماسەلەلەردىڭ ۋشىققانىنا الاڭدايدى. پروبلەمالاردى شەشۋ ءۇشىن ناقتى شارالار قابىلداناتىنىنا سەنىمدىمىن.

G7 ەلدەرىنىڭ كوشباسشىلارى ەكونوميكالىق ءال اۋقاتى تومەن ەلدەردە تۇراقتى ينفراقۇرىلىمدى دامىتۋ ءۇشىن 5 جىلدىق جوسپار قۇردى. 2027 -جىلعا دەيىن ىسكە اساتىن جوباعا 600 ميلليارد دوللار ينۆەستيتسيا قۇيىلادى. ونىڭ 200 ميللياردىن ا ق ش ۇسىنسا، 300 ميلليارد دوللاردى ەۋرووداق ەلدەرى بولەتىن بولادى.

دجو بايدەن، ا ق ش پرەزيدەنتى:

- جاھاندىق ينفراقۇرىلىم مەن ينۆەستيتسيانىڭ دامۋىنا ارنالعان باعدارلامانى ىسكە قوستىق. قازىردىڭ وزىندە الەم بويىنشا ونداعان ءىرى جوبامىز بار. وعان ا ق ش الدىعى 5 جىل ىشىندە 200 ميلليارد دوللار قارجى بولەدى. بۇل كومەك نەمەسە قايىرىمدىلىق ارەكەت ەمەس. بۇل بارلىق تاراپقا پايدا اكەلەتىن ينۆەستيتسيا.

www.24.kz

جاڭالىقتار