قىزىلوردالىق وقۋشى ەرەكشە اياق كيىمدەر تىگىپ، مول تابىس تابادى
ول بۇل كاسىبى ارقىلى مول پايداعا كەنەلىپ وتىر، دەپ حابارلايدى قازاقپارات ءتىلشىسى. ول اتالعان كاسىپتى ەكى جىلداي بۇرىن باستاعان. دۇنيەنى دۇربەلەڭگە سالعان كارانتين ۋاقىتىندا ول مەكتەپ وقۋشىسى بولسا دا ەل اراسىندا كوپ كەزدەسەتىن تىڭ كاسىپتى قولعا الدى. العاشقىدا ۇيرەنۋگە ۋاقىتىن جۇمسادى.
- بۇل ونەردى كىمنەن ۇيرەندىڭ؟ وتباسىڭدا تىگىنشىلىككە جاقىن ادامدار بار ما؟
- انامنىڭ ينە مەن جىپكە جاقىندىعى بار. قولى بوس ساتتە قۇراق كورپەشە تىگەدى. تاپسىرىس قابىلدايدى. انام مەنى اتالعان كاسىپكە بەيىمدەۋگە كوشتى. كەيبىر دۇنيەلەردى عالامتور ارقىلى دامىتتىم. شەبەرلىك كۋرستاردى ونلاين وقىدىم. ينستاگرامداعى «التىن قول» دەگەن پاراقشا ەتنوبرەندكە بەيىمدەيدى. وندا وقىتقان ۇستازدىڭ ءتالىمى نەگىزىندە ءوز ىسىمە بەيىمدەلدىم. توقىمادان وزگە دە تىڭ تىرشىلىك كوزىن تابۋعا تالپىندىم. ناتيجەسىندە اياقكيىم تىگىپ شىعارۋدى قولعا الدىم.
- اتالعان كاسىپكە قانداي تەحنولوگيا پايدالانىلادى؟
- بۇل جەردە نەگىزىنەن توقىما ءبىزى مەن يراندىق ءجىپ سەرىگىمە اينالدى. الداعى ۋاقىتتا جاڭا تەحنولوگيا ارقىلى شەبەرحانا اشۋدىجوسپارلاپ وتىرمىن. العاشقى ۋاقىتتا ءبىر اياقكيىمگە ءبىر كۇن كەتەتىن. ءقازىر تاجىريبەم دە ارتتى، كاسىپپەن اينالىسقانىما ءبىر جىلدان استى. ءقازىر ءبىر ساعات ىشىندە ءبىر ءونىمدى شىعارۋعا بولادى. ول تاپسىرىسقا بايلانىستى. ديزاينى مەن ءپىشىنى كۇردەلى بولسا، 3-4 ساعات ۋاقىتىمدى جۇمسايمىن.
- ءوزىڭ دايىنداپ شىعارعان ونىمدەردى قانشا تەڭگەگە ساتاسىڭ؟
- ادەتتە، قولدان جاسىلعان دۇنيە قىمبات تۇرادى. بىزدە سونداي وي قالىپتاسقان. سول تۇسىنىكتى بۇزعىم كەلدى. ءوزىم دايىنداعان اياق كيىمنىڭ شيكىزاتىنا 1700 تەڭگە جۇمسايمىن. ەڭبەكتى دە باعالاعان ءجون شىعار. حالىقتىڭ ىڭعايىن دا ۇمىتپاۋىمىز ءتيىس. اياق كيىمدەردىڭ ەڭ قىمباتى - 10 مىڭ تەڭگەگە باعالاندى. ارزانى - 3 مىڭ تەڭگە.
- قۇپيا بولماسا ايىنا قانشا تابىس تاباسىڭ؟
- قازىر اۋقىمدى كاسىپ جاساپ جاتقانىم جوق. ازىرگە شەبەرحاناعا قول جەتپەي تۇر. تەك تاپسىرىس بويىنشا جۇمىس جاسايمىن. سوندىقتان شيكىزاتتى ەسەپكە الماعاندا ايىنا ەڭ جوق دەگەندە 70 مىڭ تەڭگە تابىس تابامىن.
- العا قويعان ماقساتىڭ قانداي؟
- شىندىعىن ايتقاندا، ەكىنىڭ ءبىرى بۇل كاسىپتى يگەرىپ كەتە المايدى. وتە قيىن كاسىپ دەپ سانايمىن. ازىرگە تەك قولداعى مۇمكىندىگىمدى پايدالانىپ وتىرمىن. الداعى ۋاقىتتا ءتيىستى ورىندارعا جوبامدى ۇسىنىپ، كاسىبىمدى كەڭەيتكىم كەلەدى.
اۆتور: ءادىلجان ۇمبەت