گولوۆكين ءوزىن ەكىجۇزدى دەپ سانايتىن «كانەلوعا» جاۋاپ بەردى
26 ماۋسىم 14:30

گولوۆكين ءوزىن ەكىجۇزدى دەپ سانايتىن «كانەلوعا» جاۋاپ بەردى

لوس-اندجەلەس. قازاقپارات - قازاقستاندىق بوكسشى گەنناديي گولوۆكين لوس- اندجەلەستە وتكەن باسپا ءسوز ءماسليحاتىندا ءوزىن ەكىجۇزدى دەپ سانايتىن ساۋل «كانەلو» الۆارەسكە جاۋاپ بەردى، دەپ حابارلايدى قازاقپارات الەۋمەتتىك جەلىدەگى «قازاقستاننىڭ كاسىپقوي بوكسى» پاراقشاسىنا سىلتەمە جاساپ.

بۇگىن لوس- اندجەلەستە «گولوۆكين - الۆارەس» جەكپە-جەگى الدىندا باسپا ءسوز ءماسليحاتى ۇيىمداستىرىلعانىن، وندا بوكسشىلار كوز ارباسۋ پروتسەدۋراسىن وتكىزگەنىن جازعان بولاتىنبىز. بۇعان دەيىن «كانەلو» بۇل ايقاس ءوزى ءۇشىن «جەكە تەكەتىرەس» ەكەنىن ايتقان ەدى.

سونداي-اق ول گولوۆكيندى بىرنەشە رەت سوزبەن قاعىتىپ، ونى ەكىجۇزدى دەپ سانايتىنىن مالىمدەدى.

«بۇل مەن ءۇشىن جەكە ماسەلە دەپ ايتپاس ەدىم. ءوزىمدى جاقسى، نە جامان ادام ەكەنىمدى بىرەۋگە دالەلدەۋگە تالپىنبايمىن. قانداي ادام بولسام، سول قالپىمدامىن. جانە ايتىپ وتەيىن: جەكە باسقا قاتىستى سەزىمىم جوق - مەن بوكستاسۋعا شىعامىن. ەگەر مەنىڭ جەكە باسىما قاتىستى ماسەلەسى بولسا، بۇل مەنىڭ پروبلەمام ەمەس. بۇل ونىڭ شەشىمى. ونىڭ تۇسىنىگىن قالايشا وزگەرتۋىم كەرەك؟»، - دەدى گ. گولوۆكين باسپا ءسوز ءماسليحاتىندا.

قوس بوكسشىنىڭ تريلوگياسى الدىندا ەكى باسپا ءسوز ءماسليحاتى ۇيىمداستىرىلاتىنى وسىعان دەيىن حابارلاندى. ءبىرىنشىسى 24-ماۋسىمدا وتسە، ەكىنشىسى 27-ماۋسىمعا (نيۋ-يورك) جوسپارلانعان.

ەسكە سالساق، گەننادي گولوۆكين ەكىنشى ورتا سالماقتاعى الەمنىڭ ابسوليۋتتىك چەمپيونى ساۋل الۆارەسكە قارسى جەكپە-جەگى 17-قىركۇيەكتە وتەدى.

جەكپە-جەك لاس- ۆەگاستاعى T- Mobile ارەناسىندا بولادى. ولاردىڭ بۇعان دەيىنگى سوڭعى ەكى كەزدەسۋى دە ءدال سول جەردە ءوتتى. الەمدىك جەكپە-جەكتتىڭ ءبىرىنشىسى تەڭ اياقتالسا، ەكىنشىسىندە تورەشىلەر جەڭىستى مەكسيكالىق بوكسشىعا بەردى. ءبىراق كەيىن كوپتەگەن ساراپشىلار بۇل ناتيجەنى ادىلەتسىز دەپ اتادى. ءۇشىنشى جەكپە-جەك سۋپەرورتا سالماقتا وتەدى.

جاڭالىقتار