ۇكىمەت باسشىسى قانتتىڭ ورتاشا باعاسى شامامەن قانشا بولۋى كەرەك ەكەنىن ايتتى

نۇر-سۇلتان. قازاقپارات - قازىرگى سۇرانىسقا بايلانىستى جەكە كاسىپكەرلەر قانت باعاسىن قولدان كوتەرىپ وتىر.

ۇكىمەتتىڭ سيفرلىق كەڭسەسىندە وتكەن الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ جونىندەگى كەڭەستە ءاليحان سمايىلوۆ ماسەلەنى رەتتەۋدى تاپسىردى، دەپ حابارلايدى قازاقپارات پرەمەر- ءمينيستردىڭ رەسمي سايتىنا سىلتەمە جاساپ.

«اۋىل شارۋاشىلىعى مينيسترلىگىنىڭ دەرەكتەرىنە سايكەس، قانت قورى 100 مىڭ توننادان اسادى، ال ايىنا تۇتىنۋ - 59 مىڭ توننا. دەمەك، قور جەتكىلىكتى. ءبىراق، ءۇي جانىنداعى دۇكەندەردە قانت 700-800 تەڭگەدەن ساتىلادى. بۇل - سۇرانىستى پايدالانىپ، ۇستەمە اقى قويىپ وتىرعان جەكە تۇلعالاردىڭ زاڭسىز كاسىپكەرلىك قىزمەتىنىڭ «ناتيجەسى». جالپى، قانتتىڭ ورتاشا باعاسى شامامەن 480-490 تەڭگە/كگ بولۋى ءتيىس. مۇنى رەتكە كەلتىرۋ كەرەك»، - دەپ تاپسىردى ۇكىمەت باسشىسى.

سالالىق كوميتەت مالىمەتىنشە، بولشەك ساۋدا نىساندارىنىڭ رۇقسات ەتىلگەن ۇستەمەنى %15 دان اسىرماۋىن اكىمدىكتەر باقىلاپ وتىر. كەيىنگى اپتالاردا رەيدتىك ءىس- شارالار ءۇي جانىنداعى 42,6 مىڭ دۇكەنگە (%84,7) جۇرگىزىلگەن.

ناتيجەسىندە 712 زاڭ بۇزۋشىلىق انىقتالدى، ولار بويىنشا قاجەتتى شارالار قابىلداندى. ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ەرجان قازانبايەۆ ساۋدا ۇستەمەسىن ارتتىرۋ فاكتىلەرىن انىقتاۋ جانە زاڭنامادا كوزدەلگەن شارالاردى قابىلداۋ ءۇشىن مونوپولياعا قارسى ورگاندار مەن ج ا و- عا ەلەكتروندىق شوت- فاكتۋرالاردىڭ دەرەكتەرىن جىبەرۋگە مۇمكىندىك بەرەتىن مەملەكەتتىك ورگانداردىڭ بىرلەسكەن بۇيرىعىن ازىرلەۋدى ۇسىندى.

سونداي- اق، ول قازىرگى احۋال جانە باعانى تۇراقتاندىرۋ بويىنشا قابىلدانىپ جاتقان شارالار تۋرالى باياندادى. جىل باسىنان بەرى باعا 17,1 پايىزعا كوتەرىلگەن.

اتاپ ايتقاندا، پياز، قىرىققابات، قانت، كارتوپ، ءسابىز، قاراقۇمىق باعاسى قىمباتتاعان. وڭىرلەر بويىنشا باعا جامبىل جانە ماڭعىستاۋ وبلىستارىندا 18,7 پايىزعا، الماتى وبلىسىندا 18,6 پايىز، نۇر- سۇلتان جانە الماتى قالالارىندا 18,5 پايىز جانە شىمكەنت قالاسىندا 18 پايىزعا وسكەن.

اتالىپ وتكەنىندەي، جاقىن شەتەل نارىقتارىندا دا ازىق- تۇلىك تاۋارلارى باعاسىنىڭ ءوسۋى بويىنشا جاعداي وسىنداي. ماسەلەن، رەسەيدە جىل باسىنان بەرى ازىق- تۇلىك باعاسىنىڭ ورتاشا ءوسۋى شامامەن 40 پايىز، وزبەكستاندا 48 پايىز بولدى. اۋىل شارۋاشىلىعى مينيسترلىگىنىڭ دەرەكتەرى بويىنشا، قازىرگى ۋاقىتتا ەلىمىزدە سيىر ەتىن (22292 توننا)، قۇس ەتىن (19600 توننا) ، كارتوپتى (93749 توننا) ، ۇندى (118506 توننا)، ءسۇتتى (59640 توننا) جانە باسقاسىن قوسا العاندا، 607 مىڭ توننا كولەمىندە نەگىزگى ازىق-تۇلىك قورى بار.