پوپۋليزمگە جول بەرمەۋ، باستاعان رەفورمانى اياقتاۋ - جاپونيانىڭ ءبىلىم جۇيەسى قانداي

نۇر-سۇلتان. قازاقپارات - ق ر وقۋ- اعارتۋ ءمينيسترى اسحات ايماعامبەتوۆ جاپونيانىڭ ءبىلىم جۇيەسىندەگى ەرەكشەلىككە قاتىستى جاريالانعان ماقالامەن ءبولىستى، دەپ حابارلايدى قازاقپارات ءتىلشىسى.

« ءبىلىم بەرۋدە دالەلدەر مەن زەرتتەۋلەرگە ەكپىن قويىپ، سودان كەيىن شەشىمدەر قابىلداۋ وتە ماڭىزدى. ءبىلىم بەرۋ جۇيەسىن رەفورمالاۋداعى جاپونيانىڭ 30 -جىلعا جۋىق تاجىريبەسىنەن كوپ ماعلۇمات الۋعا بولادى»، - دەپ جازدى ا. ايماعامبەتوۆ ءوزىنىڭ تەلەگرام كانالىندا.

وسى ورايدا مينيستر اتالعان ەلدىڭ وقۋ- اعارتۋ سالاسىنداعى ەكى ماڭىزدى ەرەكشەلىككە توقتالدى. «بىرىنشىدەن، ۇكىمەتتىڭ قوعامنىڭ ۇلكەن قىسىمىنا جانە PİSA زەرتتەۋىنىڭ بىرنەشە تسيكلىندەگى ەل كورسەتكىشتەرىنىڭ تومەندەۋىنە قاراماستان، باستالعان رەفورمالاردى جالعاستىرۋ جانە قوعامنىڭ بەلگىلى ءبىر بولىگىنىڭ تالاپتارىنا باعىنۋ ارقىلى پوپۋليزمگە جول بەرمەۋ كوزقاراسى.

ەكىنشىدەن، مەكتەپ رەفورماسىن جۇزەگە اسىرۋعا قوعام مەن ساراپشىلاردى كەڭىنەن تارتۋ. رەفورما 20-عاسىر يندۋسترياسىنان 21-عاسىر ەكونوميكاسىنا ءوتۋ قاجەتتىلىگىنە بايلانىستى 1984 -جىلى باستالدى. وتكەن عاسىردىڭ 80-جىلدارىندا ەكونوميكاسى بويىنشا ەكىنشى ورىن العان جاپونيا ۇكىمەتى ەكونوميكالىق رەفورمالاردى باستاۋعا شەشىم قابىلداپ، ول ءۇشىن باستى نازارعا ءبىلىم بەرۋ جۇيەسىن رەفورمالاۋ مىندەتى الىنادى. بۇل رەفورما تەك مەكتەپ باعدارلامالارىن عانا ەمەس، سونىمەن بىرگە ءبىلىم بەرۋدى باسقارۋ جۇيەسىن، باعالاۋدى، ۇلتتىق تەستىلەۋدى، پەداگوگتەردىڭ بىلىكتىلىگىن ارتتىرۋدى، قارجىلاندىرۋدى، جوو- عا ءتۇسۋ ەمتيحاندارىن جانە باسقا دا جۇيەلەردى دە قامتىدى»، - دەدى ا. ايماعامبەتوۆ.

وسى ورايدا ۆەدومستۆو باسشىسى بۇل مالىمەتتەرگە قاتىستى زەرتەۋ دەرەكتەرىنىڭ سىلتەمەسىمەن ءبولىستى.