قازاقتىڭ ۇلتتىق «ورتەكە» ءبيى يۋنەسكونىڭ مادەني مۇرا تىزىمىنە ەنگىزىلەدى

نۇر-سۇلتان. قازاقپارات - قازاقتىڭ ۇلتتىق ءبيى - «ورتەكە» يۋنەسكونىڭ تىزىمىنە ەنگىزىلەدى.

بۇل مالىمەتتى قازاقپارات ءتىلشىسىنىڭ ساۋالىنا جاۋاپ بەرگەن مادەنيەت جانە سپورت مينيسترلىگىنىڭ باسپا ءسوز قىزمەتى حابارلادى.

مينيسترلىك مالىمەتىنشە، ساراپشىلاردان قۇرالعان كوميسسيا ۇلتتىق ءبيدى يۋنەسكونىڭ تىزىمىنە قوسۋ ۇسىنىسىن 2019 -جىلى جاساعان.

«قانداي دا ءبىر مۇرانى اتالعان ۇيىمنىڭ تىزىمىنە ەنگىزۋ ءۇشىن قاتىسۋشى ەل ءبىرقاتار تالاپتاردى ورىنداۋى كەرەك. ەڭ الدىمەن مەملەكەت تانىستىرۋ بەينەروليگىن اعىلشىن جانە فرانتسۋز تىلدەرىندە ءتۇسىرىپ يۋنەسكو- نىڭ باس شتابىنا ۇسىنىس جولدايدى. ماتەريالدىق ەمەس مادەني مۇرانى ساقتاۋ جونىندەگى ۇكىمەتارالىق كوميتەت مۇشەلەرى ۇسىنىستى قاراستىرىپ، شەشىمدى داۋىس بەرۋ ارقىلى قابىلدايدى. ماسەلەن، ءبىز «ورتەكە» ءبيىن ۇكىمەتارالىق كوميتەت قاراۋىنا 2019 -جىلى ۇسىندىق. دەگەنمەن ونى يۋنەسكو تاراپىنان ىلگەرىلەتۋ پروتسەسسى بيىل عانا باستالدى»، - دەپ ءمالىم ەتتى مينيسترلىكتىڭ باسپا ءسوز قىزمەتى اگەنتتىك ءتىلشىسىنىڭ ساۋالىنا وراي.

سونداي-اق ۆەدومستۆو وكىلدەرى يۋنەسكو نەلىكتەن ۇلتىمىزدىڭ وسى ونەرىنە قىزىعۋشىلىق تانىتقانىن ايتتى.

«قازاقتىڭ ەتنومۋزىكا جانە ەتنوتەاتر سالاسىنداعى زەرتتەۋلەرىندە «ورتەكە» ونەرى تۋرالى دەرەكتەر از. دەگەنمەن كەيبىر عالىمداردىڭ ەڭبەكتەرىندە «ورتەكەنىڭ» 3 مىڭ جىلدان استام ۋاقىت بۇرىن پايدا بولعانى كورسەتىلگەن. بەلگىلى مۋزىكاتانۋشى عالىم احمەت جۇبانوۆ قازاقتىڭ قۋىرشاق تەاترى ءوز باستاۋىن وسى ونەردەن الاتىنىن اتاپ وتكەن. سونىمەن قاتار بۇل تۋرالى عالىم الكەي مارعۇلاننىڭ، بەلگىلى كۇيشى جانە زەرتتەۋشى ابدۋلحاميت رايىمبەرگەنوۆتىڭ، مۇرات وسكەمبايەۆتىڭ جازبالارىندا كەزدەسەدى. بۇدان باسقا «ورتەكە» ەجەلگى قولدانبالى ونەر شەبەرلەرىنىڭ ەڭبەكتەرىنە ارقاۋ بولعان. وعان دالەل تامعالى، ەشكىولمەس، كۇلجاباسى سياقتى ەڭ كونە ەسكەرتكىشتەردە بەينەلەنگەن پەتروگليفتەر. وسىلاردى ەسكەرە كەلە، اتالعان ونەر يۋنەسكونىڭ ماتەريالدىق ەمەس مۇراسىنىڭ تىزىمىنە ەنگىزۋە ناقتى لايىق دەپ ەسەپتەيمىز»، - دەلىنگەن حابارلامادا.

ۆەدومستۆو 2013 -جىلدان باستاپ قازاقستاننىڭ ماتەريالدىق ەمەس مادەني مۇرالارىنىڭ ۇلتتىق ءتىزىمىن جاساۋ، ونى يۋنەسكوعا ەنگىزۋ جۇمىستارىن جۇرگىزىپ كەلەدى. وسى ۋاقىتقا دەيىن قازاق حالقىنىڭ 11 مادەني مۇراسى ۇيىمنىڭ تىزىمىنە كىردى.

اۆتور: ءاليحان اسقار