وزبەكستان تۇركى اكادەمياسى حالىقارالىق ۇيىمىنا باقىلاۋشى مارتەبەسىن الدى
24 ماۋسىم 19:55

وزبەكستان تۇركى اكادەمياسى حالىقارالىق ۇيىمىنا باقىلاۋشى مارتەبەسىن الدى

نۇر-سۇلتان. قازاقپارات - بۇگىن نۇر-سۇلتان قالاسىندا وتكەن حالىقارالىق تۇركى اكادەمياسى عىلىمي كەڭەسىنىڭ كەزەكتى V وتىرىسى بارىسىندا وزبەكستان رەسپۋبليكاسى حالىقارالىق ۇيىمعا رەسمي تۇردە باقىلاۋشى مارتەبەسىنە يە بولدى.

وسىعان قاراي، حالىقارالىق تۇركى اكادەمياسىنىڭ عيماراتى الدىندا وزبەكستاننىڭ مەملەكەتتىك تۋىن سالتاناتتى كوتەرۋ ءراسىمى ءوتتى، دەپ حابارلايدى قازاقپارات.

تۇركى اكادەمياسىنىڭ عيماراتىندا وتكەن رەسمي جيىندا ۇيىم پرەزيدەنتى دارحان قىدىرالى وزبەكستان رەسپۋبليكاسىنىڭ قازاقستانداعى ەلشىسى سايديكرام نيازحودجايەۆتان وزبەكستاننىڭ مەملەكەتتىك تۋىن قابىلداپ الىپ، ارنايى تۋ تۋعىرعا سالتاناتتى كوتەرۋ ءراسىمىن جاسادى.

وسىلايشا تۇركى الەمىنىڭ عىلىمي-ينتەللەكتۋالدى ورتالىعى سانالاتىن تۇركى اكادەمياسى ىرگەسىن كەڭەيتىپ، عىلىمي ينتەگراتسيا اۋقىمىن جاڭا بەلەسكە كوتەردى.

ايتا كەتۋ كەرەك، 2019-جىلدىڭ تۇركى ىنتىماقتاستىق ۇيىمىنىڭ (سول كەزدەگى تۇركى كەڭەسى) باكۋ قالاسىندا وتكەن 8- سامميتتىندە وزبەكستان ۇيىمعا تولىققاندى مۇشە بولىپ قابىلداندى.

وسىعان قاراي، ىنتىماقتىستىق اياسىندا وزبەكستان تاراپى تۇركى اكادەمياسىنا باقىلاۋشى مەملەكەت مارتەبەسىن الۋ ءۇشىن رەسمي ءوتىنىم بەردى.

بۇعان دەيىن حالىقارالىق تۇركى اكادەمياسىنا تۇركى الەمىنىڭ ەلدەرىمەن ىنتىماقتاستىق ينستيتۋتتارى اراسىندا باقىلاۋشى مارتەبەسىنە ءوتىنىش قابىلداعان العاشقى ۇيىم ماجارستان بولعان ەدى.

جاڭالىقتار