امەريكالىقتارعا قوعامدىق ورىندا قارۋ ۇستاۋعا رۇقسات بەرىلدى
24 ماۋسىم 18:13

امەريكالىقتارعا قوعامدىق ورىندا قارۋ ۇستاۋعا رۇقسات بەرىلدى

ۆاشينگتون. قازاقپارات – ا ق ش- تىڭ جوعارعى سوتى نيۋ-يوركتە قوعامدىق ورىنداردا جاسىرىن اتىس قارۋىن الىپ ءجۇرۋدى شەكتەيتىن زاڭنىڭ كۇشىن جويدى، دەپ حابارلايدى قازاقپارات Deutsche Welle-گە سىلتەمە جاساپ.

سوت ورگانى زاڭناما اكتىسى ا ق ش كونستيتۋتسياسىن ەكىنشى تۇزەتۋدە ەنگىزىلگەن «قارۋدى ساقتاۋ جانە الىپ ءجۇرۋ» قۇقىعىن بۇزعانىن اتاپ ءوتتى.

سۋديالاردىڭ شەشىمى ادامداردىڭ نيۋ-يورك كوشەلەرىندە جانە لوس-اندجەلەس پەن بوستون سياقتى باسقا دا ءىرى قالالاردا زاڭدى تۇردە قارۋ الىپ جۇرۋىنە مۇمكىندىك بەرمەك.

بۇل – ا ق ش جوعارعى سوتىنىڭ ون جىلدان استام ۋاقىت ىشىندە قارۋ-جاراق تۋرالى قابىلداعان العاشقى ءىرى شەشىمى.

ول جاقىندا بولعان جاپپاي اتىستاردان كەيىن قابىلدانىپ وتىر.

نيۋ-يورك قالاسىنىڭ مەرى ەريك ادامس بۇل شەشىمنەن تۋىندايتىن قاۋىپتى ازايتۋ ءۇشىن جۇمىس ىستەيتىنىن جانە شاھاردىڭ «جابايى باتىسقا» اينالۋىنا جول بەرمەيتىنىن مالىمدەدى.

ا ق ش پرەزيدەنتىنىڭ اكىمشىلىگى سۋديالاردى نيۋ-يورك زاڭىن ساقتاۋعا شاقىردى. دجو بايدەن «قاتتى كوڭىلى قالعانىن» ايتتى. ول ازاماتتاردى قارۋ-جاراق قولدانىلاتىن زورلىق-زومبىلىقتان قورعاۋ ءۇشىن «ەستى» زاڭدار قابىلداۋعا شاقىردى.

جاڭالىقتار