ۋكراينا ەۋروپالىق وداققا مۇشە بولۋعا دايىن - زەلەنسكيي

نۇر-سۇلتان. قازاقپارات - ۋكراينا مەن مولدوۆا مەملەكەتى ءۇشىن ماڭىزدى تاريحي وقيعا.

ەۋروپالىق وداق قوس ەلگە دە ۇيىمعا كىرۋگە ۇمىتكەر مارتەبەسىن بەردى، دەپ حابارلايدى «حابار 24».

ءبىراق قاۋىمداستىققا قوسىلۋ پروتسەسسى ۇزاققا سوزىلۋى مۇمكىن.

ۋكراينا مەن مولدوۆاعا ۇمىتكەر ەل مارتەبەسىن بەرۋ ماسەلەسى كەشە بريۋسسەلدە وتكەن سامميتتە شەشىلدى.

قاراردى 529 دەپۋتات قولداپ، 45 ءى قارسى شىقتى. كيەۆ ءوتىنىشتى قارۋلى قاقتىعىس باستالعان سوڭ بىرنەشە كۇننەن كەيىن، ال مولدوۆا گرۋزيامەن بىرگە ناۋرىزدىڭ باسىندا بەرگەن ەدى.

ۋكرايناداعى احۋالدان كەيىن بۇل پروتسەسس جىلدام ءجۇردى. كيەۆ ەندى ءبىرقاتار رەفورمانى جۇزەگە اسىرۋى ءتيىس.

ۋرسۋلا فون دەر ليايەن، ەۋروكوميسسيا پرەزيدەنتى:

- بۇگىن ەۋروپا ءۇشىن ماڭىزدى كۇن. بۇل مەملەكەتتەر ۇيىمعا مۇشە بولۋ كەزەڭىنە اياق باسپاس بۇرىن ءبىرقاتار مىندەتتەردى ورىنداۋى ءتيىس. اتالعان ەلدەر جىلدام قيمىلداپ، قاجەتتى رەفورمالاردى تەزىرەك جۇزەگە اسىرادى دەپ سەنەمىن. بۇل وزگەرىستەر وسى ەلدەردەگى دەموكراتيانى نىعايتىپ، حالقىنىڭ ءال-اۋقاتىن جاقسارتۋعا باعىتتالعان.

پرەزيدەنت ۆلاديمير زەلەنسكي سامميتكە قاتىسۋشىلاردىڭ شەشىمىن ۇلكەن جەڭىس ءارى ەۋروپانى نىعايتۋعا باعىتتالعان ماڭىزدى قادام دەپ باعالادى.

ۆلاديمير زەلەنسكي، ۋكراينا پرەزيدەنتى:

- ءبىز ەۋروكوميسسيادان العان قۇجاتتى تەز تولتىرىپ جىبەردىك. مەن ۋكراينا ەۋروپالىق وداققا مۇشە بولۋعا دايىن ەكەنىن ايتامىن. ەۋرووداق سوعىستان كەيىن ەلىمىزدى قالپىنا كەلتىرۋ كەزىندە دە بىرگە بولاتىنىنا سەنىمدىمىن.

الايدا ۋكراينانىڭ وداققا قوسىلۋ ءۇردىسى ۇزاققا سوزىلۋى مۇمكىن. قازىر 7 مەملەكەت ءدال وسىنداي مارتەبەگە يە. ولاردىڭ قاتارىندا البانيا، سولتۇستىك ماكەدونيا، چەرنوگوريا، سەربيا جانە تۇركيا بار.

انكارانىڭ بريۋسسەلدىڭ وڭ شەشىمىن سارعايا كۇتكەنىنە 20 جىل بولدى. بالقان ەلدەرى ماسەلەسى دە ءالى شەشىمىن تاپپاي كەلەدى.

روبەرت گولوب، سلوۆەنيا پرەمەر-ءمينيسترى:

- وكىنىشكە قاراي بالقان ەلدەرى ۇيىمعا قوسىلۋدى ەسكى تارتىپپەن باستاعان ەدى. ەندى جاڭا جاعدايعا بەيىمدەلۋگە ءماجبۇر بولىپ وتىر. ءبىراق بۇل ەلدەر ۇمىتىلعان جوق دەپ ۇمىتتەنەمىز. ەجەلدەن رەسەي وداقتاسى بولىپ سانالاتىن سەربيا ءوزىنىڭ سىرتقى ساياساتىن ەۋروپالىق وداقپەن كەلىسىپ جۇرگىزۋدەن باس تارتىپ كەلەدى.

ال سولتۇستىك ماكەدونيا مەن البانيانىڭ وتىنىشتەرىن بولگاريا قولداماي وتىر.