ەۋروپادا كوروناۆيرۋس جۇقتىرۋ جاعدايلارى كۇرت ارتتى
24 ماۋسىم 15:24

ەۋروپادا كوروناۆيرۋس جۇقتىرۋ جاعدايلارى كۇرت ارتتى

نۇر-سۇلتان. قازاقپارات - ەۋروپا ەلدەرىندە كوروناۆيرۋس ينفەكسياسىن جۇقتىرۋ جاعدايلارى ارتىپ كەلەدى.

قازاقپارات بۇل تۋرالى قازاقستاندا COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيا مالىمەتىنە سىلتەمە جاساپ حابارلايدى.

جازدىڭ باستالۋىمەن كوروناۆيرۋستىڭ «وميكرون» نۇسقاسى مەن ونىڭ جاڭا فورمالارىنىڭ ءورشۋى كۇتىلەدى.

ستاتيستيكا مالىمەتتەرىنە ارنالعان «Our World in Data» سايتىنداعى دەرەككە سۇيەنسەك، پورتۋگاليا، گەرمانيا، فرانسيا، يتاليا، يسپانيا، گرەتسيا، دانيا جانە نيدەرلاندتا ۆيرۋسقا شالدىعۋ جاعدايلارى كۇن ساناپ ارتىپ كەلەدى.

پورتۋگاليا مامىر ايىنىڭ ورتاسىنان ينفەكسيانىڭ وسىمىمەن كۇرەسۋدە. ەۋروپا ەلدەرى اراسىندا مۇندا ينفەكسيانى جۇقتىرۋدىڭ اپتالىق كورسەتكىشى ەڭ جوعارى.

«وميكروننىڭ» جاڭا - BA.5 نۇسقاسى ەپيدەميولوگيالىق احۋالدىڭ ناشارلاۋىنا سەبەپ بولىپ وتىر.

پورتۋگاليادا ناۋقاستاردىڭ %90 ۆيرۋستىڭ وسى ءتۇرى انىقتالعان. سونداي-اق پورتۋگاليادا سوڭعى اپتادا ءولىم-ءجىتىم دە ارتتى.

«Our World in Data» مالىمەتىنە سايكەس، باتىس ەۋروپانىڭ بارلىق ەلدەرى اراسىندا حالىق ءولىمى پورتۋگاليادا ەڭ جوعارى. گەرمانيادا 100 مىڭ تۇرعىنعا شاققانداعى سىرقاتتانۋشىلىقتىڭ اپتالىق كورسەتكىشى 400 دەن اسادى.

روبەرت كوح اتىنداعى ينستيتۋت سوڭعى تاۋلىك ىشىندە كوروناۆيرۋستى جۇقتىرعاندار سانى تاعى 119 مىڭ ادامعا ارتقانىن حابارلادى. بۇعان ينفەكسيانىڭ BA.4 جانە BA.5. نۇسقالارى سەبەپ بولۋى مۇمكىن.

ءبىراق ينستيتۋت باسشىسى ورىنباسارىنىڭ ايتۋىنشا، قورعانۋ شارالارىن الىپ تاستاۋ كوروناۆيرۋسقا قاتىستى احۋالدى ناشارلاتۋى مۇمكىن.

يتاليادا اۋرۋدىڭ اپتالىق ينديكاتورىنا سايكەس، ناۋقاستاردىڭ سانى كۇرت ارتتى.

يتاليا دەنساۋلىق ساقتاۋ مينيسترلىگىنىڭ دەرەگىنشە، ىندەت ەكىنشى اپتا قاتارىنان ءورشىپ كەلەدى.

ۆيرۋستىڭ تارالۋ جىلدامدىعى تاعى دا ەپيدەميا دەڭگەيىنە جەتتى.

ايتا كەتەيىك، قازاقستان اۋماعىندا دا كوروناۆيرۋس جۇقتىرعان ناۋقاستار سانى كوبەيىپ كەلەدى.

جاڭالىقتار