پرەزيدەنت ەۋروپاداعى قاۋىپسىزدىك جانە ىنتىماقتاستىق ۇيىمىنىڭ وكىلىن قابىلدادى
قاسىم-جومارت توقايەۆ ماتەو مەكاچچيگە ءىلتيپات بىلدىرە وتىرىپ، ونىڭ بۇل ساپارى ەۋروپاداعى قاۋىپسىزدىك جانە ىنتىماقتاستىق ۇيىمىمەن اراداعى قارىم- قاتىناستى نىعايتۋ تۇرعىسىنان ماڭىزدى ەكەنىن اتاپ ءوتتى.
كەزدەسۋدە قازاقستان مەن ە ق ى ۇ دەموكراتيالىق ينستيتۋتتار جانە ادام قۇقىقتارى جونىندەگى بيۋرو اراسىنداعى دەموكراتيانى دامىتۋ، ادام قۇقىقتارى مەن زاڭ ۇستەمدىگىن قامتاماسىز ەتۋ سالاسىنداعى ىنتىماقتاستىقتىڭ جاعدايى مەن ونى دامىتۋ پەرسپەكتيۆالارى تالقىلاندى.
پرەزيدەنت قازاقستان رەسپۋبليكاسىنداعى ادام قۇقىقتارى جونىندەگى ۋاكىل مەن بيۋرو اراسىندا قول قويىلعان ءوزارا تۇسىنىستىك جونىندەگى مەموراندۋمدى قولدادى.
ونىڭ ايتۋىنشا، بۇل قۇجات ەلىمىزدىڭ بيۋرومەن تىعىز سەرىكتەستىكتى دامىتۋعا دايىن ەكەنىن جانە ە ق ى ۇ قۇندىلىقتارىنا بەيىلدىلىگىن راستايدى. قاسىم-جومارت توقايەۆ بيۋرو ديرەكتورىنا جاڭا قازاقستاندى قۇرۋعا باعىتتالعان اۋقىمدى رەفورمالاردىڭ نەگىزگى ماقساتتارى مەن مىندەتتەرى جونىندە ايتتى.
ماتەو مەكاچچي ە ق ى ۇ پارلامەنتتىك اسسامبلەياسى اياسىندا قاسىم-جومارت توقايەۆپەن قىزمەتتەس بولعان كەزەڭدى جانە بۇدان بۇرىن قازاقستانعا كەلگەن ساپارلارىن ىقىلاسپەن ەسكە الدى.
بيۋرو ديرەكتورى قازاقستانمەن اراداعى ىنتىماقتاستىقتى ودان ءارى نىعايتۋعا ءازىر ەكەنىن اتاپ ءوتىپ، ەلىمىزبەن ءوزارا بەلسەندى ءىس- قيمىلدىڭ دامۋ بارىسىنا كوڭىلى تولاتىنىن ايتتى. سونداي- اق ول قاسىم-جومارت توقايەۆتىڭ باسشىلىعىمەن جۇزەگە اسىرىلىپ جاتقان اۋقىمدى رەفورمالاردى قولدايتىنىن جانە قازاقستان ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ماڭىزدى سەرىكتەسى ەكەنىن اتاپ ءوتتى.