يۆان دىچكو ارگەنتينالىق بوكسشىمەن جەكپە-جەكتە جەڭىسكە جەتتى
24 ماۋسىم 08:54

يۆان دىچكو ارگەنتينالىق بوكسشىمەن جەكپە-جەكتە جەڭىسكە جەتتى

نۇر-سۇلتان. قازاقپارات - قازاقستاندىق بوكسشى يۆان دىچكو (11-0، 11 ك و) بۋەنوس- ايرەستە (ارگەنتينا) وتكەن بوكس كەشىندە ونەر كورسەتتى، دەپ حابارلايدى قازاقپارات Sports.kz سايتىنا سىلتەمە جاساپ.

ول ارگەنتينالىق كيەۆين ەسپيندولامەن (7-3، 2 ك و) كەزدەستى. سۋپەراۋىر سالماقتاعى جەكپە- جەك 10 راۋندقا ەسەپتەلدى جانە ول سوڭىنا دەيىن سوزىلدى. يۆان دىچكو تورەشىلەردىڭ ءبىراۋىزدى شەشىمىمەن جەڭىسكە جەتتى.

وسىلايشا، قازاقستان بوكسشىسى كاسىبي سپورتتاعى 12-جەڭىسىنە قول جەتكىزدى. ي. دىچكو بارلىق ايقاستارىن مەرزىمىنەن بۇرىن جەڭىسپەن اياقتاعان بولاتىن. ونىڭ بۇعان دەيىنگى جەكپە-جەگى بىلتىرعى جەلتوقسان ايىندا نۇر-سۇلتان قالاسىندا 45 جاستاعى رەسەيلىك الەكساندر ۋستينوۆقا (36-6-1، 27 ك و) قارسى ءوتتى. ول وپپونەنتىن ءبىرىنشى راۋندتا تەحنيكالىق نوكاۋتپەن جەڭدى.

ال كيەۆين ەسپيندولا رينگتە وسىمەن ءتورتىنشى رەت جىعىلىپ وتىر. ول بيىلعى ءساۋىر ايىندا تورەشىلەردىڭ ءبىراۋىزدى شەشىمىمەن جەرلەسى ناۋەل پالاسيوستادان (1-7، 0 ك و) باسىم ءتۇستى.

جاڭالىقتار