قىزمەتىمدە قازاق ءتىلىنىڭ پايداسى كوپ ءتيدى - پوليتسەي ۆيتالي ماكسيموۆ
«پوليتسيا كۇنى» مەرەكەسى قارساڭىندا پوليتسەيمەن سۇحباتتاسقان ەدىك.
ۆيتاليي ۆاسيليەۆيچ، ءسىزدى بۇگىنگى كاسىبي مەرەكەڭىزبەن قۇتتىقتايمىن. ءسىز قاشان جانە قاي جەردە ومىرگە كەلدىڭىز؟
- مەن الماتى وبلىسى، اقسۋ اۋدانى، ماتاي ستانساسىندا 1996 -جىلى ومىرگە كەلدىم. 2017 -جىلدان باستاپ بۇگىنگە دەيىن الماتى قالاسى جەتىسۋ اۋدانىنىڭ پاتۋرلدىك پوليتسيا ينسپەكتورى بولىپ قىزمەت ەتىپ كەلەمىن. لەيتەنانت شەنىم بار.
بۇل سالاعا قالاي كەلدىڭىز؟
- كىشكەنتاي كەزىمنەن پوليتسيا بولسام دەپ ارماندادىم. سول ارمانىم بۇگىندە ورىندالعانىنا قۋانىشتىمىن. ەلىمنىڭ تىنىشتىعى ءۇشىن قىزمەت ەتۋدى ابىروي سانايمىن.
قازاق تىلىندە ەركىن سويلەيدى ەكەنسىز. ايتىڭىزشى، بۇل ءتىلدى قالاي ۇيرەنىپ ءجۇرسىز؟
- ەندى مەن قازاق اۋىلىندا تۋىپ ءوستىم، سوندا تۇردىم. كورشىلەرىم، دوستارىم، سىنىپتاستارىم، ءبارى قازاق بولدى. ولارمەن بالا كەزدەن وسى تىلدە ەركىن سويلەسىپ ءوستىم. سودان بولار، قازاق تىلىندە ەركىن سويلەيمىن. ءبىراق، ءوزىم ورىس مەكتەبىندە وقىعام.
وتباسىڭىزدا قازاقشا سويلەسەسىزدەر مە؟
- ۇيدە اكەم مەن انام قازاقشا تۇسىنەدى، ءبىراق، سويلەي المايدى. ال سوڭىمنان ءوسىپ كەلە جاتقان ەكى قارىنداسىم قازاق ءتىلىن ەندى ۇيرەنىپ كەلەدى. ايەلىممەن قازاقشا سويلەسە بەرەمىز. ايتپاقشى، ايەلىم قازاق، اتى ءجونى ايدانا دانيسپەكوۆا، تالدىقورعاننىڭ تۋماسى، رۋى - نايمان. ايتا كەتەيىن، مەندە قازاقتىڭ ۇلت اسپاپتارىن جاقسى ويناسام دەگەن ارمانىم بار. بۇگىندە ولاردى اقىرىنداپ ۇيرەنىپ ءجۇرمىن.
ايتىڭىزشى، قازاق ءتىلىن ۇيرەنۋ ءۇشىن ادامعا الدىمەن نە قاجەت؟
- قازاق ءتىلىن ۇيرەنۋ ءار ادامنىڭ ارمان، تىلەگىنە بايلانىستى دەپ ويلايمىن. ەگەر ادامنىڭ شىن ارمان، نيەتى بولسا، ول تەك قازاق ءتىلى ەمەس، باسقا دا شەت تىلدەردى ەركىن مەڭگەرىپ الارى ءسوزسىز. شىنىمدى ايتسام، قازىر مەنىڭ پوليتسيا قىزمەتكەرى بولىپ وتىرعانىم قازاق ءتىلىنىڭ ارقاسى. وسى ءتىلدىڭ ارقاسىندا جۇمىسقا كىرگەم. بۇگىندە جۇمىستا ادامدارمەن قازاقشا سويلەسەمىن. جالپى، قازاق ءتىلىنىڭ جەكە ءومىرىم مەن قىزمەتىمدە كوپ پايداسى ءتيدى.
ۆيتاليي، پوليتسيا بولعىسى كەلەتىن جاستارعا قانداي اقىل، كەڭەس ايتار ەدىڭىز؟
-پوليتسيا بولعىسى كەلەتىن جاستارعا ايتارىم، الدىمەن الدارىنا قويعان ماقساتتارىنا جەتە ءبىلۋى ءتيىس. سونداي- اق، بويىندا ادامنىڭ شىنشىلدىق، جىگەرلىلىك جانە باسقا دا جاقسى قاسيەتتەرى بولعانى دۇرىس.
سۇحباتىڭىزعا راحمەت! ەڭبەگىڭىزگە تابىس تىلەيمىن.
اۆتور: دۋمان ارعىنگەلدى