قاسكوي قارشاداي بالاعا پىشاق توسەگەندە قاتەلەسۋگە جول جوق ەدى - پوليتسەي

وسكەمەن. قازاقپارات - بالا كۇننەن پوليتسيا قىزمەتكەرى بولۋدى قالاعان دوسىم باقىتبەكوۆ بۇگىندە بۇل ماقساتىنا جەتىپ وتىر. قاۋىرت قىزمەتتىڭ قيىنشىلىعىنا مويىماعان ساقشى ءتۇرلى وقيعالاردى باستان كەشكەن.

قازاقپارات ءتىلشىسى 23-ماۋسىم - قازاقستان پوليتسياسى كۇنىنە وراي وسكەمەندە تەر توگىپ جۇرگەن پوليتسيا مايورىمەن سۇحبات قۇرعان ەدى.

- پوليتسەي بولۋىڭىزدىڭ سەبەبى نەدە؟

- 1989 -جىلى كۇرشىم اۋدانى قۇيعان اۋىلىندا دۇنيەگە كەلدىم. مەكتەپ بىتىرگەن سوڭ وسكەمەندەگى جوعارى وقۋ ورىندارىنىڭ بىرىنە «زاڭگەر» ماماندىعىنا قابىلداندىم. 2011 -جىلى قولىما ديپلوم الدىم. اسكەري كافەدرادا وقىپ، 40 كۇن پوليگوندا بولدىم. 2012 -جىلدىڭ تامىز ايىندا قالالىق پوليتسيا باسقارماسىنا جۇمىسقا ورنالاستىم. ءدال وسى جىلى ۇيلەنىپ، شاڭىراق كوتەردىم. نەگىزىنەن بالا كۇننەن پوليتسيا قىزمەتكەرى بولۋدى قالادىم. قىلمىسكەرلەردى قۇرىقتاپ، وزگەگە پايدامدى تيگىزگىم كەلەتىن. اۋلەتىمىزدەگى العاشقى پوليتسەي ءوزىممىن. اكەم اۋعان سوعىسىنا قاتىسقان ادام.

- اۋەلدە قيىن بولعان شىعار؟

- ءار سالانىڭ ءوز قىزىعى مەن قيىنشىلىعى بولادى. باسىندا ءسال ۇيرەنىسە الماي ءجۇردىم، اسىرەسە ۋاقىتتىڭ تاپشىلىعىنا. تاڭەرتەڭ 7-دە جۇمىسقا كەلىپ تۇنگى 1-2-لەردە قايتامىز. وسىلاي دامىلسىز جۇمىس ىستەدىك. ءبىراق قازىرگى پوليتسەيلەردە ولاي ەمەس. ۇيلەرىنە ۋاقتىلى قايتادى. كەيبىرەۋلەر بۇرىنعىنى اڭساپ جاتادى عوي. كەزىندە ءبارى جاقسى ەدى دەپ. مەنىڭشە، ءقازىر ساقشىلارعا بارلىق ءتيىستى جاعداي جاسالعان. جالاقى جوعارىلاپ، باسپاناسى جوقتارعا اي سايىن پاتەراقى دا بەرىلەدى.

- كۇنى- ءتۇنى جۇمىستا بولعانىڭىز ءۇشىن ايەلىڭىز رەنجىمەدى مە؟

- جوق. ەكەۋىمىز قىز- جىگىت بولىپ كەزدەسىپ جۇرگەنىمىزدە ول مەنىڭ وسى سالانى تاڭداعانىمدى بىلەتىن. كەيبىر ساقشىلار ۇيلەنگەن سوڭ جارتى جىل وتپەي جاتىپ اجىراسىپ كەتەتىنىن كورىپ ءجۇرمىز. كەلىنشەگىمە ۇنەمى تۇسىنىستىكپەن قاراعانىنا ريزامىن. 3 بالامىز بار: ءبىر ۇل، ەكى قىز. ايەلىم بۇرىن بانكتە جۇمىس ىستەگەن، ءقازىر جەكە كاسىپكەرلىكپەن اينالىسادى.

- ۇلىڭىز وسكەندە كىم بولامىن دەيدى؟

- اكەم سياقتى پوليتسيا قىزمەتكەرى بولامىن دەيدى. ەگەر وسكەندە راسىمەن وسى سالاعا بەت بۇرسا قارسىلىعىم جوق. ءوز تاڭداۋى وزىندە عوي. جۇمىس بارىسىندا ءبىلىم وردالارىنا بارىپ، جاستاردى پوليتسيا قاتارىنا تارتىپ، ۇگىت- ناسيحات جۇرگىزەمىز. ەل- جۇرتىنىڭ قاۋىپسىزدىگىن قامتاماسىز ەتىپ، زاڭبۇزۋشىلىققا توسقاۋىل بولعىسى كەلەتىندەر كوبەيە تۇسەدى دەگەن سەنىمدەمىن.

- جۇمىس بارىسىندا قانداي ەرەكشە وقيعالار بولدى؟

- قاۋىرت قىزمەتتىڭ ءار كۇنىندە ءبىر وقيعا بولىپ جاتادى. سونىڭ ىشىنەن بىرنەشەۋىن ايتىپ بەرەيىن. بىردە قىس كەزىندە قالادا كولىك توناۋ جيىلەپ كەتكەن-تۇعىن. كۇنىنە 4-5 كولىك تونالاتىن. وسىلاي 3 اي جالعاستى. قىلمىسكەرلەردى ۇستاۋ ءۇشىن كۇنى- ءتۇنى كوشەلەردى تورۋىلداۋمەن جۇردىك. ول كەزدە قازىرگىدەي كامەرالار جوق. تۇنگى ۋاقىت. ساعات ءتىلى شامامەن 2-دەن استى. ايازعا قاراماستان قۋىستا قيمىل-قوزعالىسسىز توسىپ وتىرمىز. كەنەت 3 جىگىت كوز الدىمىزدا كولىك توناي باستادى. تۇتقيىلدان اتىپ شىعىپ، ولاردى قولعا تۇسىردىك. سوڭىنان بەلگىلى بولعانداي، ۇشەۋى دە ستۋدەنت ەكەن. اقشانىڭ جوقتىعىنان قىلمىسقا بارىپتى. تەرگەۋ امالدارى اياقتالعان سوڭ ءىس سوتقا جىبەرىلدى. 2013-2019 -جىلدارى كامەلەتكە تولماعاندار ءىسى جونىندەگى ينسپەكتور بولدىم. سول كەزدە جاستار اراسىندا بوپسالاۋشىلىقپەن، ەسىرتكى ساتاتىندارمەن كۇرەستىك. وتباسىلىق كيكىلجىڭدەرگە دە باراتىنبىز. ءبىر كۇنى كيروۆ كوشەسىندەگى جاتاقحانادا كۇيەۋى ايەلىن دالاعا قۋىپ شىعىپتى. حابار تۇسكەن سوڭ كوپ ۇزاماي وقيعا ورنىنا كەلىپ جەتتىك. الگى ەركەك ءبىزدى كورگەندە وگەي بالاسىنىڭ تاماعىنا پىشاق توسەپ، تۇتقىنعا الدى. قارشاداي ءبۇلدىرشىن 2 اق جاستا. مۇنداي ساتتە قاتەلەسۋگە جول جوق. جەدەل جاردەم مەن ت ج د قىزمەتكەرلەرىن شاقىرتىپ قويدىق. قاسكوي ەسىك تابالدىرىعىندا تۇر. ونى سوزگە اينالدىرىپ، تەرىس قادام جاساماۋعا شاقىردىق. كەنەت بالا ونىڭ قولىنان بوساپ، ءبىر- ەكى قادام ارتقا ءجۇردى. وسى ۇرىمتال ءساتتى قالت جىبەرمەي، ارىپتەسىم ەكەۋىمىز تاپ بەردىك. كۇرتكەمەن قولىنداعى پىشاعىن جابا قويىپ، ءوزىن جەرگە قۇلاتتىق. كەيىن ەستۋىمىزشە، ول سوت شەشىمىمەن تۇرمەگە قامالىپتى.

- قىزمەتىن ەندى باستاپ جاتقان پوليتسەيلەرگە قانداي اقىل-كەڭەس ايتاسىز؟

- ءار جاس مامانمەن جەكە-جەكە جۇمىس جۇرگىزەمىز. كەلگەن العاشقى كۇنىنەن باستاپ شىدامدىلىققا باۋليمىز. پوليتسيا قىزمەتكەرى زاڭدى بۇگە- شۇگەسىنە دەيىن ءبىلۋى قاجەت. سول ءۇشىن وقۋدان جالىقپاي، ءوز تاڭداعان سالاڭا بەيىمدەلگەن ءجون. قازىر ەرتىس پ ب جەرگىلىكتى پوليتسيا قىزمەتى باستىعىنىڭ ورىنباسارى بولىپ قىزمەت ەتۋدەمىن. قاراماعىمدا كامەلەتكە تولماعاندار ءىسى جونىندەگى 24 ينسپەكتور، 43 ۋچاسكەلىك پوليتسەي مەن ونىڭ 9 كومەكشىسى بار. ولاردىڭ ءارقايسىسىنا قولىمنان كەلگەنشە كومەكتەسىپ، كورگەن- بىلگەنىمدى ايتىپ وتىرامىن. ادال ەڭبەك ەتەمىن دەگەن ادامعا ەسىگىمىز ءاردايىم اشىق. كەلىپ جاتقان جاستار اراسىندا جۇمىستىڭ اۋىرلىعىنا شىداماي كەتىپ قالاتىندار از ەمەس. نەگىزى قيىندىققا 3 جىل توزگەن ادام، ارى قاراي قىزمەت ەتە بەرەدى.

- اڭگىمەڭىزگە كوپ راحمەت!

اۆتور: تالعاتجان مۇحامەتبەك ۇلى