تورعاي اۋىلىندا احمەت بايتۇرسىن ۇلى مەن ءمىرجاقىپ دۋلات ۇلىنا ەسكەرتكىش ورناتىلماق
بۇل تۋرالى قوستاناي وبلىسىنىڭ اكىمى ارحيمەد مۇحامبەتوۆ ايتتى، دەپ حابارلايدى قازاقپارات ءتىلشىسى.
«الاش ارىسى احمەت بايتۇرسىن ۇلىنىڭ مەرەيتويىنا ارنالعان جوسپارعا سايكەس جانگەلدين اۋدانى تۇرعىندارىنىڭ تۇرمىسىن جانە ءال- اۋقاتىن جاقسارتۋ باعىتىندا ينفراقۇرىلىمدىق جوبالار ىسكە اسىرىلۋدا. مىسالى، جۋىردا عانا اقكول، ا. بايتۇرسىنوۆ اۋىلدارى موبيلدىك ينتەرنەت جەلىسىنە قوسىلدى. بۇل - مەرەيتويعا ازىرلىك بارىسىندا جەرگىلىكتى حالىقتىڭ سۇراعان نەگىزگى وتىنىشتەرىنىڭ ءبىرى بولاتىن. جەرگىلىكتى تۇرعىنداردىڭ سۇراۋى بويىنشا ا. بايتۇرسىن ۇلى اۋىلىنا اپاراتىن جولدىڭ جانە تورعاي وزەنى ارقىلى وتەتىن كوپىردىڭ جوندەۋ جۇمىستارى باستالىپ كەتتى. سونىمەن قاتار، ا. بايتۇرسىن ۇلى اۋىلىنا جاڭادان مەديتسينالىق پۋنكت سالىنىپ، اقكولدەگى اۋىلدىق امبۋلاتوريا جوندەۋدەن وتكىزىلەدى.
جوسپار اياسىندا تورعاي اۋىلىنداعى «احمەت بايتۇرسىن ۇلى مەن ءمىرجاقىپ دۋلات ۇلىنىڭ ادەبي مۋزەيىنە» جوندەۋ جانە رەەكسپوزيتسيا جۇمىستارى جۇرگىزىلۋدە»، - دەدى ءوڭىر اكىمى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، سارىتۇبەك قونىسىنداعى «احمەت بايتۇرسىن ۇلى مۋزەي- ءۇيىن» سالۋ جۇمىستارى دا قاتاڭ باقىلاۋعا الىندى. قازىرگى تاڭدا جاڭا نىساننىڭ جوبالىق سمەتالىق قۇجاتتاماسى ساراپتامادان وتكىزىلۋدە. قۇرىلىس جۇمىستارىنا وبلىس بيۋدجەتى ەسەبىنەن قوسىمشا قاراجات بولىنەتىن بولادى. كونكۋرستىق ءراسىم ناتيجەسى بويىنشا جاۋاپتى مەردىگەر تابىلسا، ءۇيدىڭ قۇرىلىسىن قىركۇيەككە دەيىن اياقتاۋ جوسپارلانعان.
«بۇگىنگى كۇنى جەرگىلىكتى حالىق، كاسىپكەرلەردىڭ دەمەۋشىلىگىمەن بايتۇرسىن اۋلەتىنىڭ قورىمى جانىنان كەسەنە سالىنىپ، تورعاي اۋىلىندا احمەت پەن ءمىرجاقىپ بابالارىمىزدىڭ قۇرمەتىنە جاڭا ەسكەرتكىش ورناتۋ ماسەلەسى پىسىقتالۋدا. بۇدان بولەك مادەني، عىلىمي، تانىمدىق ءىس- شارالار ۇيىمداستىرىلىپ جاتىر. سپەكتاكلدەر قويىلىپ، عىلىمي ەكسپەديتسيا ءوز جۇمىسىن باستادى. نەگىزگى مەرەيتويلىق ءىس- شارالار 3-5 قىركۇيەك ارالىعىنا جوسپارلانعان»، - دەدى ارحيمەد مۇحامبەتوۆ.
اۆتور: مارلان جيەمباي