ۇلتتىق قۇرىلتايدىڭ وزەگى بولاتىن ءۇش قۇندىلىق اتالدى - ۆيدەو
«ۇلتتىق قۇرىلتايدىڭ جاساقتالۋىندا، ونىڭ وتكەن ورنى مەن ۋاقىتىندا ءبىرقاتار يدەولوگيالىق تۇجىرىمداردى قامتيتىن وي بار. ءبىرىنشى وي - ءبىزدىڭ مەملەكەتتىگىمىزدىڭ تاريحى تىم تەرەڭدە. قۇرىلتايدىڭ جوشى حان كەسەنەسى ىرگەسىندە وتكىزىلۋىندە ەرەكشە ءمان جاتىر. ءبىزدىڭ مەملەكەتتىگىمىزدىڭ تاريحى التىن وردادان باستاۋ الىپ، قازاق حاندىعى داۋىرىندە قالىپتاسىپ، الاش وردا كەزەڭىندە جالعاسىپ، تاۋەلسىزدىك قازاقستان تۇسىندا قايتا جاڭعىردى. ەكىنشى وي - ۇلتتى ۇيىسۋعا ۇندەۋ. قۇرىلتايدىڭ ءبىرىنشى وتىرىسى ۇلىتاۋدا ءوتتى. ەكىنشى جيىن تۇركىستاندا بولادى. بۇل حالقىمىز ءۇشىن كيەلى جەرلەر. سوندىقتان مۇندا بارشا حالقىمىزدى بىرلىككە شاقىرعان يدەولوگيالىق وي بار. قۇرىلتايدىڭ ءدال وسى ۋاقىتتا ءوتۋى دەپ بەكەر ەمەس. كەلەلى جيىن ەل دامۋىنىڭ جاڭا باعىتىن ايقىنداعان جانە ۇلتتىڭ ۇيىسۋىنىڭ جاڭا دەڭگەيگە كوتەرىلگەنىن كورسەتكەن جالپىحالىقتىق رەفەرەندۋمنان كەيىن ءوتتى. ءۇشىنشى وي - مەملەكەت مۇددەسى بارىنەن بيىك. رەسپۋبليكا كۇنىن قايتا جاڭعىرتىپ، وعان مەملەكەتتىك مارتەبەسىنىڭ بەرىلۋى - تاۋەلسىزدىك يدەياسىمەن مەملەكەتتىك قۇندىلىقتاردى بەرىك ورنىقتىرا تۇسۋگە باعىتتالعان. وسى ءۇش قۇندىلىق جاڭا قوعامدىق شارتتى قالىپتاستىرۋ كەزىندە ءبىزدىڭ ەڭ باستى باعدارىمىز بولادى»، - دەپ اتاپ ءوتتى ەرلان قارين.
سونىمەن قاتار مەملەكەتتىك كەڭەسشى زاڭ ۇستەمدىگىن قامتاماسىز ەتۋگە، پىكىر الۋاندىلىعىن قولداۋعا جانە ماڭىزدى مەملەكەتتىك شەشىمدەر قابىلدايتىن ۋاقىتتا قوعامنىڭ پىكىرىن ەسكەرۋگە ەلىمىز دايىن ەكەنىن اتاپ ءوتتى.